பாட்னா: பிஹார் சட்டப்பேரவைத் தேர்தலில் போட்டியிடும் 143 வேட்பாளர்களின் பட்டியலை பிரதான எதிர்க்கட்சியான ராஷ்ட்ரிய ஜனதா தளம்(ஆர்ஜேடி) வெளியிட்டுள்ளது.
ஆர்ஜேடி வெளியிட்டுள்ள பட்டியலின்படி, அக்கட்சியின் இளம் தலைவரும் தற்போதைய சட்டப்பேரவை எதிர்க்கட்சித் தலைவருமான தேஜஸ்வி யாதவ், வைஷாலி மாவட்டத்தின் ரகோபூர் தொகுதியில் போட்டியிடுகிறார். ரேணு குஷ்வாஹா, பிஹாரிகஞ்ச் தொகுதியிலும், அருண் குப்தா பர்ஹாரியா தொகுதியிலும் விஷால் ஜெய்ஸ்வால் மகாராஜ்கஞ்ச் தொகுதியிலும் போட்டியிடுகின்றனர்.
ஆர்ஜேடி, காங்கிரஸ் உள்ளிட்ட கட்சிகள் அடங்கிய மகாகட்பந்தன் கூட்டணியில் தொகுதிப்பங்கீடு நிறைவடையாமல் இருந்த நிலையில், இந்த பட்டியல் வெளியாகி உள்ளது. காங்கிரஸ் கட்சியும் புதிதாக 6 வேட்பாளர்களின் பட்டியலை வெளியிட்டுள்ளது. இதன்மூலம் அக்கட்சி 60 தொகுதிகளுக்கான வேட்பாளர்களை அறிவித்துள்ளது.
முதல்கட்டத் தேர்தல் நடைபெற உள்ள 121 தொகுதிகளில் வேட்புமனுக்களைத் திரும்பப் பெறுவதற்கான கடைசி நாள் இன்று நிறைவடைய உள்ள நிலையில் இந்த பட்டியல்கள் வெளியாகி உள்ளன.
பிஹாரில் மொத்தமுள்ள 243 தொகுதிகளுக்கான சட்டப்பேரவைத் தேர்தல் நவம்பர் 6 மற்றும் 11 ஆகிய இரு தேதிகளில் நடைபெற உள்ளது. இதில், பதிவாகும் வாக்குகள் நவம்பர் 14ம் தேதி எண்ணப்பட்டு முடிவுகள் அறிவிக்கப்பட உள்ளன.
