பாரிஸ்: பிரெஞ்சு ஓபன் டென்னிஸ் தொடரில் நடப்பு சாம்பியன்களான கார்லோஸ் அல்கராஸ், இகா ஸ்வியாடெக் ஆகியோர் 2-வது சுற்றுக்கு முன்னேறினர்.
கிராண்ட் ஸ்லாம் தொடர்களில் ஒன்றான பிரெஞ்சு ஓபன் டென்னிஸ் தொடரில் பாரிஸ் நகரில் நடைபெற்று வருகிறது. இதன் 2-வது நாளான நெ்றறு ஆடவர் ஒற்றையர் பிரிவு முதல் சுற்றில் நடப்பு சாம்பியனான ஸ்பெயினின் கார்லோஸ் அல்கராஸ், 310-ம் நிலை வீரரான இத்தாலியை சேர்ந்த கியுலியோ செப்பியேரியை எதிர்த்து விளையாடினார்.
இதில் அல்கராஸ் 6-3, 6-4, 6-2 என்ற நேர் செட் கணக்கில் எளிதாக வெற்றி பெற்று 2-வது சுற்றுக்கு முன்னேறினார். 2-வது சுற்றில் ஹங்கேரியின் ஃபேபியன் மரோசானுடன் மோதுகிறார் அல்கராஸ்.
7-ம் நிலை வீரரான நார்வேயின் காஸ்பர் ரூட் 6-3, 6-4, 6-2 என்ற செட் கணக்கில் ஸ்பெயினின் அல்பர்ட் ரமோஸ் வினோலஸையும், 25-ம் நிலை வீரரான ஆஸ்திரேலியாவின் அலெக்ஸ் பாப்ரின், ஜப்பானின் யோஷிஹிடோ நிஷியோகாவையும் வீழ்த்தி 2-வது சுற்றுக்கு முன்னேறினர்.
மகளிர் ஒற்றையர் பிரிவு முதல் சுற்றில் நடப்பு சாம்பியனும் 5-ம் நிலை வீராங்கனையுமான போலந்தின் இகா ஸ்வியாடெக் 6-3, 6-3 என்ற நேர் செட் கணக்கில் 42-ம் நிலை வீராங்கனையான சுலோவேக்கியாவின் ரெபேக்கா ஸ்ராம்கோவாவை வீழ்த்தி 2-வது சுற்றில் நுழைந்தார். இகா ஸ்வியாடெக்குக்கு பிரெஞ்சு ஓபனில் இது தொடர்ச்சியான 22-வது வெற்றியாக அமைந்தது. 2-வது சுற்றில் இகா ஸ்வியாடெக், கிரேட் பிரிட்டனின் எம்மா ரடுகானுவை எதிர்கொள்கிறார்.
ரடுகனானு தனது முதல் சுற்றில் 7-5, 4-6, 6-3 என்ற செட் கணக்கில் சீனாவின் வங் சின்யுவை தோற்கடித்தார். 9-ம் நிலை வீராங்கனையான அமெரிக்காவின் எம்மா நவர்ரோ 0-6, 1-6 என்ற செட் கணக்கில் ஸ்பெயினின் ஜெசிகா பவுசாஸ் மனீரோவிடம் தோல்வி அடைந்தார்.
12-ம் நிலை வீராங்கனையான கஜகஸ்தானின் எலெனா ரைபகினா 6-1, 4-6, 6-4 என்ற செட் கணக்கில் அர்ஜெண்டினாவின் ஜூலியா ரீராவை வீழ்த்தி 2-வது சுற்றுக்கு முன்னேறினார்.
