பிரான்ஸில் இடம்பெற்ற மாணவர்கள் மற்றும் காவல்துறையினர் மோதலில் கைக்குண்டு வெடித்து பாடசாலை மாணவர் ஒருவர் பலத்த காயமடைந்துள்ள நிலையில் தீவிர விசாரணை ஆரம்பிக்கப்பட்டுள்ளது.
பிரான்ஸில் கல்வித் துறைப் பிரச்சினைகளுக்குத் தீர்வு கோரி மாணவர்கள் முன்னெடுத்து வரும் தீவிரப் போராட்டத்தின் போது நிகழ்ந்த மோதலில், பாடசாலை மாணவர் ஒருவரின் கை வெடித்துச் சிதறி பலத்த காயமடைந்துள்ளதாக சர்வதேச ஊடகங்கள் தெரிவிக்கின்றன.
பாடசாலைக் கட்டடங்களின் சீரற்ற நிலை, வகுப்பறைகளில் நிலவும் இடநெருக்கடி மற்றும் ஆசிரியர் பற்றாக்குறை ஆகியவற்றைக் கண்டித்து நாடு முழுவதும் மாணவர்கள் இந்தப் போராட்டத்தை முன்னெடுத்துள்ளனர்.
வடக்கு பிரான்ஸ் நகரமான லென்ஸில் உள்ள அகஸ்டே பெஹால் மேல்நிலைப் பாடசாலைக்கு அருகில் இந்தச் சம்பவம் நிகழ்ந்துள்ளதாக உள்ளூர் ஆளுநர் பிரான்சுவா-சேவியர் லோக் உறுதிப்படுத்தியுள்ளார். படுகாயமடைந்த மாணவர் உடனடியாக அருகிலுள்ள மருத்துவமனையில் அனுமதிக்கப்பட்ட நிலையில், அவரது உயிருக்கு ஆபத்து ஏதுமில்லை எனத் தெரிவிக்கப்பட்டுள்ளது.
கலவரத் தடுப்புக் காவல்துறையினரால் வீசப்பட்ட ‘ஸ்டிங்-பால்’ ரகக் கைக்குண்டை மாணவர் கையில் எடுக்க முயன்றபோதே அது வெடித்ததாகக் காவல்துறையினர் கூறுகின்றனர்.
எனினும், அந்த மாணவர் கைக்குண்டைத் தொடவில்லை என்றும், அது நேரடியாக அவர் மீது மோதி வெடித்ததாகவும் சம்பவத்தை நேரில் கண்ட மாணவி ஒருவர் தெரிவித்துள்ளார். இச்சம்பவம் தொடர்பில் பிரெஞ்சு காவல் விசாரணைப் பிரிவு தற்போது சிறப்பு விசாரணையை ஆரம்பித்துள்ளது.
செப்டம்பர் மாத இறுதியில் கல்விப் பிரச்சினைகளை முன்வைத்துத் தொடங்கிய இந்தப் போராட்டங்கள், தற்போது நாடு முழுவதும் உள்ள பல்கலைக்கழகங்களுக்கும் பரவியுள்ளதால் சுமார் 500 பாடசாலைகள் வரை மூடப்பட்டுள்ளன. போராட்டங்கள் ஆரம்பித்தது முதல் இதுவரை சுமார் 190 மாணவர்கள் காயமடைந்துள்ளதாக பிரான்ஸ் கல்வி அமைச்சின் தரவுகள் தெரிவிக்கின்றன.
