Last Updated:
பிரதமரின் சாதனைகளைக் கொண்டாடும் அதே நேரத்தில், வரவிருக்கும் சட்டமன்றத் தேர்தலுக்கான அடித்தளத்தையும் வலுப்படுத்த பா.ஜ.க திட்டமிட்டு செயல்பட்டு வருகிறது.
பிரதமர் நரேந்திர மோடி பொது வாழ்வில் 25 ஆண்டுகளை நிறைவு செய்வதை முன்னிட்டு, உத்தரப் பிரதேச மாநிலம் வாரணாசியில் அக்டோபர் 7-ஆம் தேதி பிரம்மாண்ட கொண்டாட்டங்களுக்கு பாரதிய ஜனதா கட்சி ஏற்பாடு செய்துள்ளது. அதே வேளையில், 2027-ல் வரவிருக்கும் உத்தரப் பிரதேச சட்டமன்றத் தேர்தலுக்கான தீவிரக் கட்சி ஆலோசனைகளிலும் பா.ஜ.க இறங்கியுள்ளது.
கடந்த 2001-ஆம் ஆண்டு அக்டோபர் 7-ஆம் தேதி நரேந்திர மோடி முதன்முறையாக குஜராத் முதலமைச்சராகப் பொறுப்பேற்றார். அதன்பின் 2014-ல் நாட்டின் பிரதமராகப் பொறுப்பேற்று இன்றுவரை தொடர்ந்து மக்கள் பணியாற்றி வருகிறார். இதைக் குறிக்கும் வகையில் செப்டம்பர் 17 முதல் அக்டோபர் 17 வரை “சேவா சங்கல்ப் அபியான்” (Seva Sankalp Abhiyan) என்ற சேவை மாதத்தை பா.ஜ.க கொண்டாடி வருகிறது.
இந்த விழாவின் முக்கிய அம்சமாக, பிரதமர் மோடியின் பிறந்த ஊரான குஜராத்தின் ‘வாத்நகர்’ மற்றும் அவரின் நாடாளுமன்றத் தொகுதியான ‘வாரணாசி’ ஆகிய இரண்டையும் இணைக்கும் இருவழி ‘சேவா யாத்திரைகள்’ நடைபெற்று வருகின்றன.
ஒரு யாத்திரை வாத்நகரிலிருந்தும், மற்றொரு யாத்திரை வாரணாசியிலிருந்தும் தொடங்கி எதிரெதிர் திசையில் பயணிக்கின்றன. சேவை நடவடிக்கைகள் மற்றும் விழிப்புணர்வுப் பரப்புரைகளுடன் பயணிக்கும் இந்த இரண்டு யாத்திரைகளும் அக்டோபர் 7 அன்று வாரணாசியில் நிறைவடைகின்றன.
அக்டோபர் முதல் வாரத்தில் உத்தரப் பிரதேசத்தில் பா.ஜ.க தனது தேர்தல் ஆயத்தப் பணிகளை தீவிரப்படுத்தியுள்ளது. அக்டோபர் 1 மற்றும் 2 ஆகிய தேதிகளில் லக்னோவில் மாநிலப் பொறுப்பாளர் வினோத் தவடே தலைமையில் தொடர் கட்சி அமைப்புக் கூட்டங்கள் நடைபெறுகின்றன.
‘சிந்தன் பைடக்’ (Chintan Baithak) என்ற சிந்தனை அமர்வு நடைபெறுகிறது. இதில் பா.ஜ.க தேசியத் தலைவர் நிதின் நபீன், முதலமைச்சர் யோகி ஆதித்யநாத் மற்றும் மூத்த தலைவர்கள் பங்கேற்று 2027 சட்டமன்றத் தேர்தல் வியூகங்கள் குறித்தும், பிராந்திய அளவிலான கட்சி நிலவரங்கள் குறித்தும் ஆலோசிக்கின்றனர்.
அக்டோபர் 7 அன்று வாரணாசியில் பிரதமர் மோடியின் 25 ஆண்டு கால சேவை நிறைவு விழா, வழிபாடுகள் மற்றும் சேவா யாத்திரை நிறைவு விழா ஆகியவை சிறப்பாக நடைபெறவுள்ளன.
பிரதமரின் சாதனைகளைக் கொண்டாடும் அதே நேரத்தில், வரவிருக்கும் சட்டமன்றத் தேர்தலுக்கான அடித்தளத்தையும் வலுப்படுத்த பா.ஜ.க திட்டமிட்டு செயல்பட்டு வருகிறது.
