பிகாரில் மீண்டும் மீண்டும் பெண்கள் மீது நடக்கும் அத்துமீறல் சம்பவம் – வைரலாகும் வீடியோ | India News (இந்தியா செய்திகள்)

பீகார் மாநிலம் பங்கா மாவட்டத்தில் அமைந்துள்ளது மந்தர் மலை. பிரபல சுற்றுலா தலமான இங்கு, பெண் ஒருவர் சிலரால் தாக்கப்பட்ட வீடியோ சமூக வலைதளங்களில் வேகமாக பரவியது. அந்த வீடியோவில், இளம்பெண்ணை சுற்றி 6 பேர் நிற்பது பதிவாகியுள்ளது. அந்த இளைஞர்கள் அந்த பெண்ணை சுற்றி நின்று அநாகரிகமாக நடந்து கொள்வதும் வீடியோவில் பதிவாகியுள்ளது. ஒரு கட்டத்தில் அந்த பெண்ணை நோக்கி ஒருவர் காலணியை பயன்படுத்தி சரமாரியாகத் தாக்கியிருக்கிறார்.அப்போது அங்கிருந்த மற்றவர்கள் அந்த சம்பவத்தை வேடிக்கை பார்ப்பது போன்ற காட்சிகளும் அதில் இடம்பெற்றுள்ளன.

இந்த வீடியோ பவுன்சி காவல் நிலைய போலீஸ் அதிகாரி பங்கஜ் குமார் ஜாவின் வாட்ஸ்அப் எண்ணுக்கு சென்றுள்ளது. வீடியோவை பார்த்த போலீசார் உடனடியாக சம்பவ இடத்துக்கு சென்று விசாரணையை தொடங்கினர்.மந்தர் மலையை சுற்றியுள்ள பகுதிகளில் வசிக்கும் பொதுமக்கள் மற்றும் கடைக்காரர்களிடம் விசாரணை நடத்தினர். வீடியோவில் இருப்பவர்கள் இளைஞர்களாக தெரிந்தாலும், அவர்களை அடையாளம் காண முடியவில்லை என அப்பகுதி கடைக்காரர்கள் தெரிவித்துள்ளனர். சம்பந்தப்பட்ட நபர்களை அடையாளம் காணும் பணியில் போலீசார் தீவிரமாக இறங்கியுள்ளனர்.

இந்த சம்பவம் மந்தர் மலை போன்ற சுற்றுலா தலங்களில் பெண்களின் பாதுகாப்பு குறித்து கேள்வியை எழுப்பியுள்ளது. பீகாரில் சமீபத்தில் ஜமுய் மாவட்டத்தில், இருசக்கர வாகனத்தில் சென்றுகொண்டிருந்த ஒரு பெண்ணையும் அவருடன் இருந்த இளைஞரையும் ஒரு கும்பல் வழிமறித்து துன்புறுத்தியதாக கூறப்படும் வீடியோ வெளியாகி நாட்டையே உலுக்கியது. இந்த சம்பவத்தில் தொடர்புடைய 3 பேர் கைது செய்யப்பட்டனர்.

அதேபோல் சமஸ்திபூர் மாவட்டத்தில் பெண் ஒருவரையும் இளைஞர் ஒருவரையும் ஒரு கும்பல் சுற்றிவளைத்து துன்புறுத்திய மற்றொரு வீடியோவும் வெளியாகி அதிர்ச்சியை ஏற்படுத்தியது. இந்த சம்பவத்தில் தொடர்புடைய 4 பேர் கைது செய்யப்பட்டனர். ஜமுய், சமஸ்திபூர் சம்பவங்களைத் தொடர்ந்து தற்போது மந்தர் மலையிலும் பெண்ணை தாக்கிய வீடியோ வெளியாகியிருப்பது பரபரப்பை ஏற்படுத்தியுள்ளது. மந்தர் மலை சம்பவத்தில் தொடர்புடைய 6 பேரையும் அடையாளம் கண்டு கைது செய்யும் பணியில் போலீசார் தொடர்ந்து விசாரணை நடத்தி வருகின்றனர்.