எஸ்.கௌசல்யா
புசல்லாவை, கலுகல்ல தோட்டத்தில் பணிபுரிந்துகொண்டிருந்த தோட்டத் தொழிலாளி ஒருவரை வியாழக்கிழமை (17) அன்று பாம்பு தீண்டியுள்ளது.
பாதிப்புக்குள்ளான 42 வயதுடைய அந்தத் தொழிலாளி, வகுவப்பிட்டிய மருத்துவமனையில் உடனடியாக அனுமதிக்கப்பட்ட பின்னர், மேலதிக சிகிச்சைக்காகக் கம்பளை மருத்துவமனைக்கு மாற்றப்பட்டுள்ளார்.
தேயிலைத் தோட்டத்தில் கொழுந்து பறித்துக் கொண்டிருந்தபோதே இச்சம்பவம் இடம்பெற்றுள்ளது.
கலுகல்ல தோட்டத்தில் சில வாரங்களுக்கு முன்னரும் பாம்பு தீண்டியதில் பெண் தொழிலாளி ஒருவர் உயிரிழந்திருந்தார் என்பது குறிப்பிடத்தக்கது.
தோட்டப் பகுதிகள் காடாக காணப்படுவதாகவும், அவற்றை முறையாகப் பராமரிப்பதற்குத் தோட்ட நிர்வாகம் எவ்வித நடவடிக்கையும் எடுப்பதில்லை என்றும் தொழிலாளர்கள் குற்றம்சாட்டுகின்றனர்.
எனவே, தோட்டங்களை காடாக்க விடாமல் முறையாகப் பராமரிக்குமாறும், தமது தொழில் பாதுகாப்பை உறுதிப்படுத்த நடவடிக்கை எடுக்குமாறும் தொழிலாளர்கள் கோரிக்கை விடுத்துள்ளனர்.
