குவாஹாட்டி: உலக ஜூனியர் பாட்மிண்டன் சாம்பியன்ஷிப் குவாஹாட்டியில் நடைபெற்று வருகிறது. இதில் மகளிர் ஒற்றையர் பிரிவு கால் இறுதி சுற்றில் 16 வயதான இந்தியாவின் தன்வி சர்மா, ஜப்பானின் சகி மட்சுமோடோவுடன் மோதினார்.
இந்த ஆட்டத்தில் தன்வி சர்மா 13-15, 15-9, 15-10 என்ற செட் கணக்கில் வெற்றி பெற்று அரை இறுதிக்கு முன்னேறினார். இதன் மூலம் அவர், குறைந்தபட்சம் வெண்கலப் பதக்கம் கைப்பற்றுவதை உறுதி செய்துள்ளார்.
இதன் மூலம் உலக ஜூனியர் பாட்மிண்டன் சாம்பியன்ஷிப் வரலாற்றில் 17 ஆண்டுகளில் பதக்கம் வெல்லும் முதல் இந்திய வீராங்கனை என்ற சாதனையை படைக்க உள்ளார் தன்வி சர்மா.
மற்றொரு கால் இறுதி ஆட்டத்தில் இந்தியாவின் உன்னதி ஹூடா 12-15, 13-15 என்ற நேர் செட் கணக்கில் தாய்லாந்தின் அன்யாபட் பிச்சிட்ஃபோனிடம் தோல்வி அடைந்தார்.
இந்த ஆட்டம் 32 நிமிடங்களில் முடிவடைந்தது. கலப்பு இரட்டையர் பிரிவு கால் இறுதி சுற்றில் இந்தியாவின் பவ்யா சாப்ரா, விசாகா டோப்போ ஜோடி 9-15, 7-15 என்ற செட் கணக்கில் சீன தைபேவின் ஹங் பிங் ஃபூ, சோ யுன் ஜோடியிடம் தோல்வி அடைந்தது.
