சமீபத்திய சீனப் புத்தாண்டு மற்றும் ஹரி ராயா பண்டிகைக் காலங்களை முன்னிட்டு செயல்படுத்தப்பட்ட ‘ஓப்ஸ் செலாமட்’ நடவடிக்கையின் போது மொத்தம் 747 குற்ற வழக்குகள் பதிவு செய்யப்பட்டன என்று டத்தோ ஶ்ரீ முகமது காலிட் இஸ்மாயில் தெரிவித்துள்ளார். இது கடந்த ஆண்டை விட 111 வழக்குகள் குறைவு என்று போலீஸ் படைத்தலைவர் கூறினார்.
இந்த இரண்டு நடவடிக்கைகளின் வெற்றிக்கும், நடமாடும் ரோந்து வாகனம் (MPV) மற்றும் மோட்டார் சைக்கிள் ரோந்துப் பிரிவு (URB) ஆகியவற்றின் பணியாளர்கள் ஆற்றிய முக்கியப் பங்கே பெருமளவில் காரணமாக அமைந்தது.
குற்றத் தடுப்பு மற்றும் கட்டுப்பாட்டில் முதல் பதிலளிப்பாளர்களாக அவர்களின் பங்கு விரைவானது மட்டுமல்லாமல், 61,122 வீடுகளை உள்ளடக்கிய வழக்கமான ரோந்துப் பணிகளை மேற்கொள்வதில் அவர்களின் தயார்நிலையையும் பிரதிபலிக்கிறது. இது குற்ற வழக்குகளைக் குறைக்க உதவியது என்று அவர் வெள்ளிக்கிழமை (ஏப்ரல் 10) இரவு நடைபெற்ற ‘ஓப்ஸ் செலாமட்’ பாராட்டு விழாவின் போது கூறினார்.
புக்கிட் அமான் குற்றத் தடுப்பு மற்றும் சமூகப் பாதுகாப்புத் துறையின் (JPJKK) முயற்சிகளுக்கு, தற்போது 1.7 மில்லியனுக்கும் அதிகமான பதிவு செய்யப்பட்ட பயனர்களைக் கொண்டுள்ள ‘தன்னார்வ ஸ்மார்ட்போன் ரோந்து’ (VSP) செயலி மேலும் ஆதரவளித்தது என்று முகமது காலித் கூறினார். “ஓப்ஸ் செலாமட்டின் போது, ’பாலிக் கம்போங்’ அறிவிப்புப் பகுதியை மொத்தம் 16,889 பயனர்கள் பயன்படுத்தினர். இது முன்பு பயன்படுத்தப்பட்ட 8,036 பயனர்களை விட இருமடங்குக்கும் அதிகமாகும் என்று அவர் மேலும் கூறினார்.
இருப்பினும், இந்த நடவடிக்கைகளின் போது பதிவான சாலை விபத்துகள் மற்றும் உயிரிழப்பு சம்பவங்களின் அதிகரிப்பு குறித்து முகமது காலிட் கவலை தெரிவித்தார். சாலைப் பாதுகாப்பை உறுதி செய்வதற்காக பல்வேறு முயற்சிகள் மேற்கொள்ளப்பட்ட போதிலும், குறிப்பிடத்தக்க சவால்கள் இன்னும் நீடிக்கின்றன என்பதை அனைத்துத் தரப்பினரும் ஒப்புக்கொள்ள வேண்டும் என்று அவர் கூறினார்.
சீனப் புத்தாண்டு மற்றும் ஹரி ராயா ஐடில்ஃபித்ரியை முன்னிட்டு மேற்கொள்ளப்பட்ட ‘ஓப்ஸ் செலாமட்’ நடவடிக்கைகளின் போது பதிவு செய்யப்பட்ட விபத்துகளின் எண்ணிக்கை, முந்தைய நடவடிக்கைகளுடன் ஒப்பிடும்போது சுமார் 1% சிறிதளவு அதிகரித்துள்ளது.
முந்தைய ஆண்டுகளில் 9,859 விபத்து வழக்குகள் பதிவான நிலையில், இந்த ஆண்டில் மொத்தம் 9,934 விபத்து வழக்குகள் பதிவு செய்யப்பட்டுள்ளன. உயிரிழப்பு விபத்துகள் கிட்டத்தட்ட 17% அதிகரித்து, 77 வழக்குகளிலிருந்து 90 வழக்குகளாக உயர்ந்துள்ளன என்று அவர் கூறினார்.
முந்தைய ‘ஓப்ஸ் செலாமட்’ நடவடிக்கையின் போது 107,365 சம்மன்கள் வழங்கப்பட்ட நிலையில், இந்த ஆண்டு நாடு முழுவதும் 144,726 சம்மன்கள் வழங்கப்பட்டுள்ளன. இது 37,361 அல்லது 34.8% அதிகரிப்பைக் குறிக்கிறது என்று முகமது காலிட் மேலும் கூறினார்.
