தனுஷ் நடிப்பில் கடைசியாக கேப்டன் மில்லர் திரைப்படம் வெளியானது. இப்படம் எதிர்பார்த்த அளவிற்கு ஓடவில்லை. இதைத்தொடர்ந்து தனுஷ் தற்போது தன் ஐம்பதாவது திரைப்படமான ராயன் பட வேலைகளில் பிசியாக இருக்கின்றார். சன் பிக்சர்ஸ் தயாரிப்பில் ஏ.ஆர் ரஹ்மானின் இசையில் உருவாகியிருக்கும் இப்படத்தின் படப்பிடிப்பு முடிவடைந்து தற்போது போஸ்ட் ப்ரொடக்ஷன் வேலைகள் விறுவிறுப்பாக போய்க்கொண்டிருக்கிறது.
இதையடுத்து இப்படம் ஜூலை 26 ஆம் தேதி வெளியாக இருப்பதாக அதிகாரபூர்வமாக அறிவிக்கப்பட்டுள்ளது. முன்பு இப்படம் ஜூன் மாதம் வெளியாகும் என அறிவிக்கப்பட்டது. அதன் பிறகு தற்போது இப்படத்தின் ரிலீஸ் ஜூலை மாதத்திற்கு தள்ளிவைக்கப்பட்டுள்ளது. தனுஷின் பிறந்தநாள் ஜூலை மாதம் 28 ஆம் தேதி வரும் நிலையில் அதற்கு சில நாட்களுக்கு முன்பு இப்படம் வெளியாக இருப்பது தனுஷ் ரசிகர்களை குஷியில் ஆழ்த்தியிருக்கிறது.
இப்படத்தை தொடர்ந்து தனுஷ் அடுத்ததாக தமிழ் மற்றும் தெலுங்கில் உருவாகும் குபேரா என்ற திரைப்படத்தில் நடித்து வருகின்றார். சேகர் கம்முலா இயக்கத்தில் தனுஷுடன் இணைந்து இப்படத்தில் ராஷ்மிகா மற்றும் நாகர்ஜுனா நடித்து வருகின்றனர். இப்படத்தின் போஸ்டர்கள் வெளியாகி ரசிகர்களின் எதிர்பார்ப்பை அதிகரித்திருக்கிறது.
இந்நிலையில் இப்படத்தை பற்றிய தகவல் ஒன்று தற்போது கிடைத்துள்ளது. தற்போது இப்படத்தின் படப்பிடிப்பு ஹைதராபாத்தில் நடைபெற்று வரும் நிலையில் படப்பிடிப்பு இறுதிக்கட்டத்தை எட்டியுள்ளதாம். ஜூலை 2 அல்லது 3 ஆம் தேதி இப்படத்தின் படப்பிடிப்பு முடிவடையும் என எதிர்பார்க்கப்படுகின்றது. இதெல்லாம் ஒருபக்கம் இருக்க இப்படத்தின் படப்பிடிப்பு தளத்தில் சற்று சலசலப்பு ஏற்பட்டுள்ளதாம்.
தனுஷை காண படப்பிடிப்பு தளத்திற்கு ரசிகர்கள் குவிந்துள்ளனர். இதனால் படப்பிடிப்பை துவங்க தாமதமாகி இருக்கின்றது. இதனால் பௌன்சர்கள் ரசிகர்களை விரட்டி அடிக்க இது சற்று சலசலப்பை ஏற்படுத்தி இருக்கின்றது. இருப்பினும் தனுஷ் அசராமல் படப்பிடிப்பை நடத்தி முடிக்க முழு ஒத்துழைப்பு கொடுத்திருக்கின்றார்.
பொதுவாக தனுஷ் படப்பிடிப்பு தளத்தில் அவ்வப்போது ரசிகர்களை சந்தித்து அவர்களுடன் புகைப்படம் எடுத்துக்கொள்வார். ஆனால் நேற்று நூற்றுக்கணக்கான ரசிகர்கள் குவிந்துள்ளனர். மேலும் குபேரா படத்தின் கெட்டப்பில் தனுஷ் இருந்ததால் அவரால் ரசிகர்களை சந்தித்து புகைப்படம் எடுக்கமுடியவில்லையாம். எனவே தான் தனுஷ் ரசிகர்களை நேற்று சந்திக்க முடியவில்லை என தகவல்கள் வந்துள்ளது என்பது குறிப்பிடத்தக்கது.
