ஸ்டாவஞ்சர்: நார்வே கிளாசிக்கல் செஸ் போட்டி அந்நாட்டில் உள்ள ஸ்டாவஞ்சர் நகரில் நடைபெற்று வருகிறது. 6 வீரர்கள் கலந்து கொண்டுள்ள இந்தத் தொடரின் 4-வது சுற்றில் உலக சாம்பியனான இந்தியாவின் டி.குகேஷ், அமெரிக்க கிராண்ட் மாஸ்டரான பேபியானோ கருனாவுடன் மோதினார். 4 மணி நேரத்துக்கும் மேல் நடைபெற்ற இந்த ஆட்டத்தில் வெள்ளை காய்களுடன் விளையாடிய குகேஷ் டிபன்ஸில் சிறப்பாக செயல்பட்டார். 74-வது நகர்த்தலின் போது ஆட்டம் டிராவில் முடிவடைந்தது.
இதைத் தொடர்ந்து வெற்றியை தீர்மானிக்க அர்மகேதான் டைபிரேக்கர் முறை கடைபிடிக்கப்பட்டது. இதில் குகேஷ் வெற்றி பெற்று 1.5 புள்ளிகளை பெற்றார். மற்றொரு இந்திய கிராண்ட் மாஸ்டரான அர்ஜூன் எரிகைசி தனது 4-வது சுற்றில் உலகின் முதல் நிலை வீரரான மேக்னஸ் கார்ல்சனை எதிர்த்து விளையாடினார். இதில் வெள்ளை காய்களுடன் விளையாடிய கார்ல்சன் 48-வது நகர்த்தலின் போது வெற்றி பெற்றார். மற்றொரு ஆட்டத்தில் அமெரிக்க கிராண்ட் மாஸ்டரான ஹிகாரு நகமுரா, சீனாவின் வெய் யி-யிடம் தோல்வி அடைந்தார்.
4 சுற்றுகளின் முடிவில் கார்ல்சன் 8 புள்ளிகளுடன் முதலிடத்திலும், பேபியானோ கருனா 7 புள்ளிகளுடன் 2-வது இடத்திலும், ஹிகாரு நகமுலா 5.5 புள்ளிகளுடன் 3-வது இடத்திலும் உள்ளனர். குகேஷ், அர்ஜூன் எரிகைசி ஆகியோர் தலா 4.5 புள்ளிகளுடன் 4-வது இடத்தை பகிர்ந்து கொண்டுள்ளனர். சீனான் வெய் யி 4 புள்ளிகளுடன் 6-வது இடத்தில் உள்ளார்.
