நாமலின் மேசையில் கிடந்த 08 இலட்சம் டொலர்கள் : கம்மன்பில வெளிப்படுத்திய விடயம்

நாடாளுமன்ற உறுப்பினர் நாமல் ராஜபக்சவின் கைது மற்றும் விளக்கமறியலில் வைக்கப்பட்டது முற்றிலும் அநியாயமான மற்றும் சட்டவிரோதமான செயல் என்று முன்னாள் அமைச்சர் உதய கம்மன்பில தெரிவித்துள்ளார்.

கொழும்பில் நடைபெற்ற ஊடக சந்திப்பில் பேசிய அவர், எந்தவித ஆதாரமும் இன்றி, ஒரே ஒரு நபரின் வாக்குமூலத்தின் அடிப்படையில் மட்டுமே இந்தக் கைது நடவடிக்கை மேற்கொள்ளப்பட்டதாகக் கூறினார்.

எட்டு இலட்சம் அமெரிக்க டொலர்கள் தரகுப் பணம்

சிறிலங்கன் ஏர்லைன்ஸுக்காக ஏர்பஸ் விமானங்களை வாங்கும் பரிவர்த்தனையில், நாடாளுமன்ற உறுப்பினர் எட்டு இலட்சம் அமெரிக்க டொலர்கள் தரகுப் பணம் பெற்றார் என்பதே அவர் மீதான குற்றச்சாட்டு.

இந்தச் சம்பவம் தொடர்பான உண்மைகளை விளக்கிய கம்மன்பில, பிரியங்கா விஜேநாயக்க ஏர்பஸ் நிறுவனத்திடமிருந்து தரகுப் பணம் பெற்றதற்கும், அந்தப் பணத்தின் ஒரு பகுதியை அவுஸ்திரேலியாவில் வசிக்கும் நிமல் பெரேரா என்ற நபருக்குக் கொடுத்ததற்கும் ஆதாரம் இருப்பதாக ஒப்புக்கொண்டார்.

இருப்பினும், நிமல் பெரேரா, நாமல் ராஜபக்சவிடம் பணத்தைக் கொடுத்தார் என்ற வாக்குமூலத்தைத் தவிர, புலனாய்வாளர்களிடம் வேறு எந்த ஆதாரமும் இல்லை என்று அவர் வலியுறுத்தினார்.

“யாரும் இல்லாதபோது,நாமல் ராஜபக்சவின் மேசையில் 800,000 டொலர்களை வைத்துவிட்டுச் சென்றதாக நிமல் பெரேரா கூறுகிறார். இந்தக் கூற்றைத் தவிர வேறு எந்த ஆதாரமும் இல்லை. இது உகண்டாவில் பணத்தை மறைப்பது, ரொக்கெட்டுகளை அனுப்புவது, தங்கக் குதிரைகளைக் கொண்டு வருவது, லம்போர்கினிகளைக் கொண்டு வருவது மற்றும் கூடுதலாக ஒரு திசைகாட்டியைக் கொண்டு வருவது போன்றதுதான்,” என்று முன்னாள் அமைச்சர் கூறினார்.

 ஒட்டுமொத்த பொதுமக்களும் பாதுகாப்பற்றவர்களாகிவிட்டனர்

ஒரு அறிக்கையில் ஒருவரின் பெயரைக் குறிப்பிட்டாலே அவரைக் கைது செய்ய முடியும் என்றால், இந்த நாட்டின் எந்தவொரு குடிமகனும் இனி பாதுகாப்பாக இல்லை என்று கம்மன்பில சுட்டிக்காட்டினார்.

குறிப்பாக பொதுச் சொத்துச் சட்டத்தின் கீழ் வழக்குகள் பதிவு செய்வதன் மூலம், சந்தேக நபர்கள் பிணை பெறுவது மிகவும் கடினமாக்கப்பட்டுள்ளது என்றும், இது ஒரு அடக்குமுறை ஆட்சியின் அறிகுறி என்றும் அவர் மேலும் கூறினார்.

இந்தத் தன்னிச்சையான நடவடிக்கையால் நாமல் ராஜபக்ச மட்டுமல்ல, ஒட்டுமொத்த பொதுமக்களும் பாதுகாப்பற்றவர்களாகிவிட்டனர் என்று உதய கம்மன்பில தனது ஊடக மாநாட்டில் வலியுறுத்தினார்.