தூத்துக்குடி:
நடுக்கடலில் மாயமான திரேஸ்புரத்தைச் சேர்ந்த ஆறு மீனவர்கள் பத்திரமாக மீட்கப்பட்டுள்ளனர்.
அனைத்துலக எல்லைக்கு அருகே தத்தளித்த ஆறு மீனவர்களைச் சக மீனவர்கள் மீட்டுள்ளனர். படகில் இருந்து எரிபொருள் வெளியேறியதால் ஆறு மீனவர்களும் அடித்துச்செல்லப்பட்டதாகத் தகவல் தெரியவந்துள்ளது .
தூத்துக்குடி மாவட்டம், திரேஸ்புரம் நாட்டுப் படகு மீன்பிடித் துறைமுகத்திலிருந்து சதீஷ்குமார் என்பவரது படகில் விக்னேஷ், அல்போன்ஸ், ஜூடு, சுதர்சன், ஜார்ஜ் ஆகிய ஆறு மீனவர்கள் கடந்த 21ஆம் தேதி ஆழ்கடலுக்கு மீன் பிடிக்கச் சென்றனர்.
இவர்கள் ராமேசுவரம் பாம்பன் கடல் பகுதியில் இருந்து 30 கடல் மைல் தொலைவில் கடலில் மீன்பிடித்துக் கொண்டு இருந்துள்ளனர். நவம்பர் 26ஆம் தேதி கரை திரும்ப வேண்டியவர்கள் கரைக்குத் திரும்பாததால் குடும்பத்தினர் அதிர்ச்சியடைந்தனர். மேலும் அவர்களைத் தொடர்புகொள்ளும் முயற்சியும் பலனிக்கவில்லை.
எனவே, இது குறித்து தூத்துக்குடி திரேஸ்புரம் நாட்டுப் படகு மீன்பிடிச் சங்கம் சார்பில் தூத்துக்குடி மீன்வளத்துறை, மாவட்ட நிர்வாகம், கடலோரப் பாதுகாப்புக் குழுமக் காவல்துறை, இந்தியக் கடலோரப் பாதுகாப்புப் படை ஆகியோரிடம் புகார் அளித்தனர்.
இதைத் தொடர்ந்து இந்தியக் கடலோரப் பாதுகாப்புப் படையினர் காணாமல் போன மீனவர்களைத் தேடும் பணியில் தீவிரமாக ஈடுபட்டு வந்தனர் என்பது குறிப்பிடத்தக்கது.
