ராவல்பிண்டி: தென் ஆப்பிரிக்க அணிக்கு எதிரான 2-வது டெஸ்ட் கிரிக்கெட் போட்டியின் முதல் இன்னிங்ஸில் பாகிஸ்தான் அணி 333 ரன்களுக்கு ஆட்டமிழந்தது. சுழற்பந்து வீச்சாளரான கேசவ் மகாராஜ் 7 விக்கெட்களை வீழ்த்தி அசத்தினார்.
ராவல்பிண்டியில் நடைபெற்று வரும் இந்த டெஸ்ட் போட்டியில் டாஸ் வென்று பேட் செய்த பாகிஸ்தான் அணி முதல் நாள் ஆட்டத்தின் முடிவில் 91 ஓவர்களில் 5 விக்கெட்கள் இழப்புக்கு 259 ரன்கள் எடுத்தது. அப்துல்லா ஷபிக் 57, இமாம் உல் ஹக் 17, கேப்டன் ஷான் மசூத் 87, பாபர் அஸம் 16, முகமது ரிஸ்வான் 19 ரன்கள் சேர்த்து ஆட்டமிழந்தனர். சவுத் ஷகீல் 42, சல்மான் ஆகா 10 ரன்களுடன் ஆட்டமிழக்காமல் இருந்தனர்.
நேற்று 2-வது நாள் ஆட்டத்தை தொடர்ந்து விளையாடிய பாகிஸ்தான் அணி 113.4 ஓவர்களில் 333 ரன்களுக்கு ஆட்டமிழந்தது. சவுத் ஷகீல் 66, சல்மான் ஆகா 45 ரன்களில் வெளியேறினர். ஷாகீன் ஷா அப்ரிடி 0, சஜித் கான் 5, ஆசிப் அப்ரிடி 4 ரன்களில் நடையை கட்டினர். நோமன் அலி 6 ரன்களுடன் களத்தில் இருந்தார். தென் ஆப்பிரிக்க அணி சார்பில் கேசவ் மகாராஜ் 42.4 ஓவர்களை வீசி 5 மெய்டன்களுடன், 102 ரன்களை விட்டுக்கொடுத்து 7 விக்கெட்களை வீழ்த்தினார். சைமன் ஹார்மர் 2, காகிசோ ரபாடா ஒரு விக்கெட் கைப்பற்றினர்.
இதையடுத்து பேட் செய்த தென் ஆப்பிரிக்க அணி நேற்றைய 2-வது நாள் ஆட்டத்தின் முடிவில் 65 ஓவர்களில் 4 விக்கெட்கள் இழப்புக்கு 185 ரன்கள் எடுத்தது. கேப்டன் எய்டன் மார்க்ரம் 32 ரன்களில் சஜித் கான் பந்தில் ஆட்டமிழந்தார். ரியான் ரிக்கெல்டன் 14 ரன்களில் ஷாகீன் ஷா அப்ரிடி பந்தில் விக்கெட்டை பறிகொடுத்தார். 54 ரன்களுக்கு 2 விக்கெட்களை இழந்த நிலையில் டிரிஸ்டன் ஸ்டப்ஸுடன் இணைந்த டோனி டி ஸோர்ஸி பார்ட்னர்ஷிப்பை கட்டமைத்தார். 3-வது விக்கெட்டுக்கு 113 ரன்கள் சேர்த்த இந்த ஜோடியை ஆசிப் அப்ரிடி பிரித்தார்.
டோனி டி ஸோர்ஸி 93 பந்துகளில், 2 சிக்ஸர்கள், ஒரு பவுண்டரியுடன் 55 ரன்கள் எடுத்த நிலையில் ஆசிப் அப்ரிடி பந்தில் எல்பிடபிள்யூ முறையில் ஆட்டமிழந்தார். இதையடுத்து களமிறங்கிய டெவால்ட் பிரேவிஸ் ரன்கள் ஏதும் எடுக்காத நிலையில் ஆசிப் அப்ரிடி பந்தில் நடையை கட்டினார்.
டிரிஸ்டன் ஸ்டப்ஸ் 184 பந்துகளில், ஒரு சிக்ஸர், 6 பவுண்டரிகளுடன் 68 ரன்களும் விக்கெட் கீப்பர் பேட்ஸ்மேனான கைல் வெர்ரெய்ன் 10 ரன்களும் சேர்த்து ஆட்டமிழக்காமல் களத்தில் இருந்தனர். கைவசம் 6 விக்கெட்கள் இருக்க 148 ரன்கள் பின்தங்கிய நிலையில் இன்று 3-வது நாள் ஆட்டத்தை எதிர்கொள்கிறது தென் ஆப்பிரிக்க அணி.
