துர்காபூர் மருத்துவ மாணவி கூட்டு பலாத்காரம்; மம்தாவை கடுமையாக சாடிய பாதிக்கப்பட்ட பெண்ணின் தந்தை | இந்தியா

மேற்கு வங்கம் மாநிலம், பஸ்சிம் பர்தமான் மாவட்டத்தின் துர்காபூர் பகுதியில் தனியார் மருத்துவக் கல்லூரி ஒன்று செயல்பட்டு வருகிறது. இந்தக் கல்லூரியில் ஒடிசாவைச் சேர்ந்த 23 வயது மாணவி படித்துவருகிறார். அவர், கடந்த 10ஆம் தேதி இரவு தனது ஆண் நண்பருடன் உணவு அருந்த வெளியே சென்ற போது, மர்ம நபர்களால் கூட்டு பாலியல் வன்கொடுமை செய்யப்பட்டார். இந்தச் சம்பவம் மேற்குவங்கம் மட்டுமின்றி இந்தியா முழுக்க பெரும் அதிர்ச்சியை ஏற்படுத்தியுள்ளது.

இன்று (12ஆம் தேதி) இந்தச் சம்பவம் குறித்து பேசிய அம்மாநில முதலமைச்சர் மம்தா பேனர்ஜி, “இது தனியார் கல்லூரி. ஒடிசா கடற்கரையில் கடந்த மூன்று வாரத்திற்கு முன்பு மூன்று பெண்கள் பாலியல் வன்கொடுமை செய்யப்பட்டனர். ஒடிசா அரசு என்ன நடவடிக்கை எடுத்தது? தனியார் கல்லூரியில் படிக்கும் மாணவி அதிகாலை 12.30 மணிக்கு எப்படி வெளியே வந்தார்? இந்தச் சம்பவம் வனப்பகுதியில் நடந்திருப்பதாக தற்போதைக்கு தெரியவருகிறது.

பெண்கள் இரவில் வெளியே (கல்லூரிக்கு) செல்ல அனுமதிக்கக்கூடாது. அவர்களும் தங்களைப் பாதுகாத்துக் கொள்ள வேண்டும். வனப்பகுதி உள்ளது. போலீசார் அனைவரையும் சோதனை செய்கிறார்கள். யாரும் மன்னிக்கப்பட மாட்டார்கள். குற்றவாளிகள் யாராக இருந்தாலும் கண்டிப்பாக தண்டிக்கப்படுவார்கள். இந்த விவகாரத்தில் ஏற்கனவே மூன்று பேர் கைது செய்யப்பட்டுள்ளனர். நிச்சயம் கடுமையான நடவடிக்கை எடுக்கப்படும்” எனத் தெரிவித்துள்ளார்.

முதல்வர் மம்தா பேனர்ஜியின் இந்தக் கருத்து தற்போது கடும் விமர்சனத்திற்கு உள்ளாகிவருகிறது. இந்நிலையில், கடந்த ஆண்டு ஆகஸ்ட் மாதம் கொல்கத்தாவில் உள்ள ஆர்.ஜி.கர் மருத்துவக் கல்லூரி மருத்துவமனையில் பாலியல் வன்கொடுமை செய்யப்பட்டு, கொல்லப்பட்ட முதுநிலை பயிற்சி மருத்துவரின் தந்தை, முதல்வர் மம்தா பேனர்ஜியின் இந்தப் பேச்சை கடுமையாக விமர்சித்துள்ளார்.