தந்தை வீசிய முதல் பந்தை சிக்சர் அடித்த மகன்.. கிரிக்கெட்டில் நடந்த சுவாரசிய நிகழ்வு!

ஆப்கானிஸ்தான் கிரிக்கெட் அணியில் சீனியர் ஆட்டக்காரராக முஹம்மது நபி இருந்து வருகிறார். 40 வயதான முகமது நபி கடந்த 18 ஆண்டுகளுக்கும் அதிகமாக கிரிக்கெட் விளையாடுகிறார். 440க்கும் அதிகமான டி20 கிரிக்கெட் போட்டிகளில் விளையாடியுள்ளார் முகமது நபி.

மேலும் உலகம் முழுவதும் சுமார் 40 அணிகளுக்காக அவர் விளையாடி சாதனையை ஏற்படுத்தியுள்ளார். கடைசியாக ஆப்கானிஸ்தான் அணிக்காக கடந்த ஆண்டு டிசம்பர் மாதம் அவர் விளையாடினார். இந்நிலையில் அவருடைய மகன் ஹசன் ஈசாக்கில் என்பவரும் தற்போது கிரிக்கெட்டில் களம் இறங்கியுள்ளார்.

இந்நிலையில் ஆப்கானிஸ்தான் தலைநகர் காபுலில் டி20 கிரிக்கெட் லீக் மேட்ச் நடைபெற்று வருகிறது. இதில் ஆமோ ஷார்க்ஸ் மற்றும் ஐநாக் நைட்ஸ் அணிகள் மோதின. இந்த போட்டியில் ஷார்க்ஸ் அணிக்காக முகமது நபியின் மகன் ஹசன் ஈசாக்கில் விளையாடினார்.

இந்நிலையில் முகமது நபி ஆட்டத்தின் 9ஆவது ஓவரின் முதல் பந்தை அதாவது தன்னுடைய ஸ்பெல்லின் முதல் பந்தை வீசியபோது, அவரது மகன் ஹசன் ஈசாக்கில் அதனை லாங் ஆன் திசையில் சிக்ஸருக்கு அடித்து தந்தையை வரவேற்றார்.

இது குறித்த வீடியோ ஒன்று தற்போது கிரிக்கெட் ரசிகர்கள் மத்தியில் வைரலாகி வருகிறது.