ஒரு வயது 11 மாத மகனைக் கொடூரமாகத் துஷ்பிரயோகம் செய்ததாகச் சந்தேகத்தின் பேரில் கணவன் மனைவியைக் காவல்துறையினர் கைது செய்துள்ளனர்.
கோலா திரங்கானு காவல்துறைத் தலைவர் அஸ்லி நூர் கூறுகையில், ஆகஸ்ட் 6 ஆம் தேதி மாலை 4.14 மணியளவில் சிறுவன் இறந்தது குறித்து சுல்தானா நூர் சாஹிரா மருத்துவமனையிலிருந்து காவல்துறைக்கு அறிக்கை கிடைத்தது.
இரண்டு உடன்பிறப்புகளில் இளையவரான அந்தக் குழந்தையை, பிற்பகல் 1 மணியளவில் அவரது தந்தை மற்றும் மாற்றாந்தாய் மயக்கமடைந்த நிலையில் மருத்துவமனைக்குக் கொண்டு வந்ததாக அவர் கூறினார்.
அவரைப் பொறுத்தவரை, பாதிக்கப்பட்டவர் விழுந்துவிட்டதாகவும், அவரது நெற்றியில் வீக்கம் ஏற்பட்டதாகவும் சந்தேக நபர்கள் கூறினர், ஆனால் அவரது தந்தை வீக்கத்தைக் குறைக்க ஐஸ் தடவிய பிறகு அவர் வழக்கம்போல் விளையாடினார்.
“இருப்பினும், மறுநாள் (புதன்கிழமை) நண்பகல் வேளையில், சந்தேக நபர் (பாதிக்கப்பட்டவரின் தந்தை) பாதிக்கப்பட்டவர் பலவீனமாகவும், அவரது உடல் தளர்வாகவும் இருப்பதைக் கண்டார். வலிப்பு ஏற்படுவதைத் தடுக்க சிறுவனின் கழுத்தில் மசாஜ் செய்ததாகவும், இதனால் சிராய்ப்பு ஏற்பட்டதாகவும் அந்த நபர் கூறினார்,” என்று அவர் இன்று ஒரு அறிக்கையில் தெரிவித்தார்.
தலையில் காயங்கள்
சந்தேக நபர்கள் பாதிக்கப்பட்டவரை மனீர் சுகாதார மருத்துவமனைக்கு அழைத்துச் சென்றதாகவும், ஆனால் அவரது நிலைமை மோசமாக இருந்ததால் மருத்துவமனைக்குப் பரிந்துரைக்கப்பட்டதாகவும் அஸ்லி கூறினார்.
பாதிக்கப்பட்டவருக்குத் தலையில் காயங்கள் இருப்பதுடன், மழுங்கிய பலத்த காயத்தால் ஏற்பட்டதாக நம்பப்படும் காயங்களும் இருப்பதாகப் பரிசோதனையில் தெரியவந்துள்ளது என்று அவர் கூறினார்.
நேற்று பிற்பகல் 2.05 மணிக்குப் பாதிக்கப்பட்டவர் இறந்துவிட்டதாக அறிவிக்கப்பட்டது. உடற்கூறு ஆய்வில், மழுங்கிய பொருளினால் ஏற்பட்ட காயத்தின் காரணமாக மூளையக இரத்தப்போக்கு ஏற்பட்டதால் மரணம் நிகழ்ந்தது தெரியவந்தது.
விசாரணையின்போது, சந்தேக நபர்கள் துணியை மாட்டுகிற கம்பியால் பாதிக்கப்பட்டவரை அடித்ததாக ஒப்புக்கொண்டனர்,” என்று அவர் கூறினார்.
சிறுவன் அடக்கம் செய்யப்பட்ட சிறிது நேரத்திலேயே, 27 வயது ஆணும் 30 வயது பெண்ணும் மாராங்கில் இரவு 10 மணியளவில் கைது செய்யப்பட்டதாக அவர் கூறினார்.
குழந்தைகள் சட்டம் 2001 இன் பிரிவு 31(1)(a) இன் கீழ் அவர்கள் இன்று முதல் ஏழு நாட்களுக்குக் காவலில் வைக்கப்படுகிறார்கள்.
“இந்தச் சம்பவத்தில் பயன்படுத்தப்பட்ட துணி தொங்கும் கருவியையும் போலீசார் பறிமுதல் செய்தனர். சந்தேக நபர்களின் மூன்று வயதுடைய மற்றொரு மகன் சமூக நலத்துறையின் பராமரிப்பில் வைக்கப்பட்டுள்ளார்,” என்று அவர் மேலும் கூறினார்.
