தசாங்கம் என்பதும் தூபம் போடப் பயன்படும் ஒருவகை சாம்பிராணி தான். ஆனால் இது சாதாரண சாம்பிராணி அல்ல. சித்த மூலிகை கலவையால் உருவான தெய்வீகப் பொருள். “தசம்” என்றால் பத்து. பத்து வகையான புனிதமும் நறுமணமும் கொண்ட மூலிகைகள் சேர்க்கப்பட்டதால் இதற்கு தசாங்கம் என்று பெயர்.சித்தர் பெருமக்கள் தூபம், அபிஷேகம், மன சுத்தி, சூழல் சுத்தி இவற்றுக்காகக் குறிப்பிட்ட பாரம்பரிய மூலிகை கலவையே இந்த தசாங்கம். ஆலயங்களில் தூபமாக அபிஷேகப் பொருட்களில் வீட்டு பூஜைகளில் சூழல் சுத்தி செய்ய ஆதிகாலம் முதல் தசாங்கம் பயன்படுத்தப்பட்டு வருகிறது. இதன் புகையில் கலந்துள்ள மூலிகை நறுமணம் மனதை அமைதிப்படுத்தும், தெய்வீக உணர்வைத் தூண்டும் என்று சித்த மரபு கூறுகிறது.
பாரம்பரியமாகக் குறிப்பிடப்படும் தசாங்க மூலிகைகள்: வெட்டி வேர், லவங்கம், வெள்ளை குங்குலியம், ஜாதிக்காய், மட்டிப்பால், சந்தனத் தூள், நாட்டு சர்க்கரை, திருவட்ட பச்சை, சாம்பிராணி, கீச்சிலி கிழங்கு இவை ஒவ்வொன்றும் நறுமணம், தூய்மை, சூழல் சமநிலை ஆகியவற்றுக்காக சித்தர்களால் தேர்ந்தெடுக்கப்பட்டவை.
தசாங்க தூபம் போடுவதால் கிடைக்கும் பலன்கள்:
- மன அமைதி, தசாங்கத்தின் நறுமணம் மன அழுத்தத்தைக் குறைத்து பூஜையில் மனம் ஒன்றச் செய்கிறது.
- தெய்வீக உணர்வு, கோயில்களில் வீசும் புனித நறுமணம் போல் வீட்டிலும் ஆன்மிக சூழல் உருவாகும்.
- எதிர்மறை ஆற்றல் நீக்கம், பாரம்பரிய நம்பிக்கையின்படி தசாங்க தூபம் வீட்டில் உள்ள எதிர்மறை எண்ணங்கள், கண் திருஷ்டி போன்றவற்றை விலக்க உதவும்.
- திருஷ்டி கழிப்பு, பூஜைக்குப் பிறகு வீட்டு மூலை, முடுக்குகளில் தசாங்க தூபம் காட்டுவது நல்லதாகக் கருதப்படுகிறது.
- உடல்–மனம் புத்துணர்ச்சி, இதன் புகை நுகர்வு மனதிற்கு இலகுவான புத்துணர்ச்சியைத் தரும் என்று அனுபவ சார்ந்த நம்பிக்கை உள்ளது.
- குடும்ப ஒற்றுமை மற்றும் ஐஸ்வர்யம், தினசரி பூஜையில் தசாங்க தூபம் பயன்படுத்துவது வீட்டில் அமைதி, செழிப்பு, நல்ல சக்தி நிலைத்திருக்க உதவும் என்று நம்பப்படுகிறது.
- தூபம் முடிந்த பிறகு சாம்பலை செடி, கொடிகளுக்கு இடலாம். பாரம்பரியமாக இது நல்ல சக்தி தரும் என்று நம்பப்படுகிறது. பூஜைக்குப் பிறகு சிறு குழந்தைகளுக்கு மிதமாக (புகை நேரடியாக இல்லாமல்) காட்டுவது நல்லது என்று பாரம்பரியமாகச் சொல்லப்படுகிறது.
