இலங்கை மத்திய வங்கி தங்க அடகுக் கடன்களுக்கான அதிகபட்ச கடன்-மதிப்பு விகிதத்தை 70% ஆகக் குறைத்து உத்தரவு பிறப்பித்துள்ளது. ஆளுநர் நந்தலால் வீரசிங்கவின் கையொப்பத்துடன் இன்று முதல் உடனடியாக அமலுக்கு வரும் இந்த உத்தரவு, அனைத்து வங்கிகள் மற்றும் நிதி நிறுவனங்களுக்கும் பொருந்தும்.
தங்க அடகுக் கடன்களுக்கான அதிகபட்ச கடன் மற்றும் மதிப்பு விகிதத்தை 70 சதவீதமாகக் குறைக்கும் விசேட அறிவிப்பை இலங்கை மத்திய வங்கி இன்று (மே 25) வெளியிட்டுள்ளது. நாட்டின் நிதித் தொகுதியின் ஸ்திரத்தன்மையை உறுதிப்படுத்துவதையும், அபாய மேலாண்மையை வலுப்படுத்துவதையும் முதன்மை நோக்கமாகக் கொண்டு இந்த நடவடிக்கை எடுக்கப்பட்டுள்ளது.
2023-ஆம் ஆண்டின் 16-ஆம் இலக்க மத்திய வங்கிச் சட்டத்தின் 105(1) பிரிவின் கீழ், நிதி மேற்பார்வை அதிகாரியான ஆளுநர் கலாநிதி பி. நந்தலால் வீரசிங்கவின் கையொப்பத்துடன் இந்தப் புதிய அறிவுறுத்தல் கோவை வெளியிடப்பட்டுள்ளது. இந்த உத்தரவு இன்று (2026 மே 25) முதல் உடனடியாக அமலுக்கு வருகிறது.
அனைத்து உரிமம் பெற்ற வர்த்தக வங்கிகள், உரிமம் பெற்ற விசேட வங்கிகள் மற்றும் உரிமம் பெற்ற நிதி நிறுவனங்கள் இந்த விதியைக் கண்டிப்பாகப் பின்பற்ற வேண்டும் என அறிவிக்கப்பட்டுள்ளது. இன்று முதல் புதிதாக வழங்கப்படும் தங்கக் கடன்கள் மற்றும் புதுப்பிக்கப்படும் தங்கக் கடன்கள் ஆகிய அனைத்துக்கும் இந்த 70% அதிகபட்ச எல்லை பொருந்தும்.
அடகு வைக்கும் வசதிகள், தங்கக் கடன்கள் மற்றும் தங்கத்தைப் பிணையாக வைத்து வழங்கப்படும் வேறு எந்தவொரு கடன் அல்லது நிதி வசதிகளும் இந்தப் புதிய உத்தரவின் கீழ் கொண்டு வரப்பட்டுள்ளன. தங்கத்தின் மதிப்பாக, அதன் தற்போதைய சந்தை மதிப்பே கணக்கில் எடுத்துக்கொள்ளப்பட வேண்டும் எனவும், கடன் வழங்கப்படும் நேரத்தில் செய்யப்படும் மதிப்பீடானது, பிணையாக வைக்கப்படும் தங்கத்தின் துல்லியமான மற்றும் நியாயமான மதிப்பைப் பிரதிபலிக்கிறது என்பதை வங்கிகளும் நிதி நிறுவனங்களும் உறுதி செய்ய வேண்டும் எனவும் தெரிவிக்கப்பட்டுள்ளது.
தங்கத்தை மதிப்பிடுவதற்காக ஏற்கெனவே பயன்படுத்தப்பட்டு வரும் விவேகமான நடைமுறைகளை (Prudent Practices) தொடர்ந்து பின்பற்றுமாறும் நிறுவனங்களுக்கு அறிவுறுத்தப்பட்டுள்ளது.
நிதி நிறுவனங்களின் கடன் வழங்கும் தரத்தை வலுப்படுத்துவதன் மூலம், நாட்டின் ஒட்டுமொத்த நிதித் தொகுதியின் பாதுகாப்பையும் ஸ்திரத்தன்மையையும் உறுதி செய்வதே இந்த நடவடிக்கையின் முக்கிய நோக்கம் என மத்திய வங்கி வலியுறுத்தியுள்ளது.
