தங்க முலாம் பூசப்பட்ட உரிமமற்ற துப்பாக்கியொன்றைக் கைப்பற்றிய சம்பவம் தொடர்பில், முன்னாள் அமைச்சர் துமிந்த திசாநாயக்க மற்றும் கசகஸ்தான் நாட்டைச் சேர்ந்த ஐகுல் ஷெர்காசினா ஆகியோருக்கு எதிராகத் தாக்கல் செய்யப்பட்டுள்ள வழக்கினை நவம்பர் மாதம் 4ஆம் திகதி விசாரணைக்கு எடுக்குமாறு கொழும்பு மேல் நீதிமன்றம் உத்தரவிட்டுள்ளது.
குறித்த வழக்கு இன்று (02) கொழும்பு மேல் நீதிமன்ற நீதிபதி முன்னிலையில் விசாரணைக்கு எடுத்துக்கொள்ளப்பட்ட போது, பிரதிவாதிகளான முன்னாள் அமைச்சர் துமிந்த திசாநாயக்க மற்றும் ஐகுல் ஷெர்காசினா இருவரும் நீதிமன்றத்தில் ஆஜராகியிருந்தனர்.
இதன்போது, பிரதிவாதிகள் சார்பில் ஆஜராகும் ஜனாதிபதி சட்டத்தரணி சுகவீனமுற்றுள்ள காரணத்தினால், இந்த வழக்கைப் பூர்வாங்க வழக்கு விசாரணை மாநாட்டிற்காக (Pre-trial Conference) எதிர்வரும் நவம்பர் மாதம் 4ஆம் திகதி வரை ஒத்திவைக்க நீதிமன்றம் உத்தரவு பிறப்பித்துள்ளது.
கடந்த 2025ஆம் ஆண்டு மே மாதம் 20ஆம் திகதி வெள்ளவத்தை பகுதியில் அமைந்துள்ள ஹவ்லொக் சிட்டி (Havelock City) குடியிருப்புத் தொகுதியில், உரிமமின்றித் தங்க முலாம் பூசப்பட்ட துப்பாக்கியொன்றைத் தம்வசம் வைத்திருந்தமை மற்றும் அதற்கு உடந்தையாக இருந்தமை போன்ற குற்றச்சாட்டுகளின் கீழ் சட்டமா அதிபரினால் இந்தப் பிரதிவாதிகளுக்கு எதிராகக் குற்றப்பத்திரிகை தாக்கல் செய்யப்பட்டுள்ளமை குறிப்பிடத்தக்கது.
