சீன ஜனாதிபதி ஷி ஜின்பிங்குடன் இரண்டு நாட்கள் நடத்திய விரிவான பேச்சுவார்த்தைக்குப் பிறகு தைவானுக்கு ஆயுதங்களை விற்பனை செய்வது குறித்து உறுதியளிக்க ஜனாதிபதி டொனால்ட் ட்ரம்ப் மறுத்துள்ளார்.
தைவான் விவகாரம் குறித்து இருவரும் மிக விரிவாக விவாதித்ததாகக் குறிப்பிட்ட ட்ரம்ப், சீனாவுடன் மோதல் ஏற்படும் பட்சத்தில் தைவானை அமெரிக்கா பாதுகாக்குமா என்ற நேரடித் தார்மீகக் கேள்விக்குப் பதிலளிக்கத் தவிர்த்துவிட்டார்.
ஆயுத விற்பனை குறித்து குறுகிய காலத்திற்குள் ஒரு முடிவை எடுக்கப்போவதாக அவர் தெரிவித்திருந்தாலும் இந்தத் தயக்கமானது சர்வதேச அரங்கில் சீனாவுக்குக் கிடைத்த ஒரு குறிப்பிடத்தக்க இராஜதந்திர வெற்றியாகவே பார்க்கப்படுகிறது.
தற்போதைய கருத்துக்கள்
இந்த விவகாரத்தில் ஷி ஜின்பிங்கின் கருத்துகளையே எதிரொலிக்கும் வகையில் பேசிய ட்ரம்ப், தைவான் ஆயிரக்கணக்கான ஆண்டுகளாகச் சீனாவுடன் இருந்ததாக ஷி வாதிட்டதாகவும் அவர் அங்கு ஒரு சுதந்திர இயக்கத்தைக் காண விரும்பவில்லை எனவும் செய்தியாளர்களிடம் தெரிவித்துள்ளார்.
நெடுங்காலமாகப் பின்பற்றப்படும் ஒரே சீனா கொள்கையின் கீழ் தைவானைச் சீனாவின் ஒரு பகுதியாக வாஷிங்டன் ஏற்றுக் கொண்டாலும் அதன் மீதான கம்யூனிஸ்ட் கட்சியின் அதிகாரத்தை இதுவரையில் அங்கீகரிக்கவில்லை.
இந்தச் சூழலில் ட்ரம்பின் தற்போதைய கருத்துக்கள் அமெரிக்காவின் நீண்டகால வெளியுறவுக் கொள்கையில் ஒரு மாற்றத்தைக் குறிக்கிறதா என்ற கேள்வியை எழுப்பியுள்ளது.
தைவான் உறவுகள்
தைவான் உறவுகள் சட்டத்தின் படி தைவான் தன்னைத் தற்காத்துக் கொள்வதற்கான உதவிகளை வழங்க அமெரிக்கா சட்டப்படி கடமைப்பட்டுள்ளது.
இருப்பினும், சீனாவுடனான வர்த்தகப் பேச்சுவார்த்தைகள் மற்றும் ஹோர்முஸ் நீரிணைப் பிரச்சினைகளைத் தீர்ப்பதற்கான ஒரு பேரம் பேசும் கருவியாக தைவானை ட்ரம்ப் பயன்படுத்தக்கூடும் என்று அமெரிக்க மற்றும் தைவான் அதிகாரிகள் அச்சம் தெரிவிக்கின்றனர்.
ட்ரம்பின் இந்தத் தெளிவற்ற நிலைப்பாடு, சீனாவுக்குச் சாதகமான ஒரு வாய்ப்பை ஏற்படுத்திக் கொடுத்துள்ள அதேவேளையில், ஆசிய-பசிபிக் பிராந்தியத்தின் பாதுகாப்புச் சமநிலையை மாற்றி அமைக்கும் எனக் கருதப்படுகின்றமை குறிப்பிடத்தக்கது.
செய்திகளை உடனுக்குடன் தெரிந்து கொள்ள IBC தமிழ் WHATSAPP இல் இணைந்து கொள்ளுங்கள்…! |
