சென்னை: சென்னை சூப்பர் கிங்ஸ் (சிஎஸ்கே) அணி நிர்வாகம், தென் ஆப்பிரிக்க வீரர் டெவால்ட் பிரேவிஸை ஒப்பந்தம் செய்தது தொடர்பாக எழுந்த சர்ச்சைக்கு இந்திய கிரிக்கெட் அணியின் முன்னாள் வீரர் ரவிச்சந்திரன் அஸ்வின் விளக்கம் அளித்துள்ளார்.
கடந்த ஏப்ரல் மாதம் இந்தியாவில் நடைபெற்ற ஐபிஎல் கிரிக்கெட் போட்டித் தொடரின் போது காயம் அடைந்த வேகப்பந்து வீச்சாளர் குர்ஜப்னீத் சிங்குக்கு பதிலாக தென் ஆப்பிரிக்க அணியின் இளம் வீரரான டெவால்ட் பிரேவிஸை சிஎஸ்கே அணி ஒப்பந்தம் செய்திருந்தது. குர்ஜப்னீத் சிங் ஒப்பந்தம் செய்யப்பட்டிருந்த ரூ.2.20 கோடி தொகைக்கே டெவால்ட் பிரேவிஸ் ஒப்பந்தம் செய்யபப்ட்டார்.
இந்நிலையில் டெவால்ட் பிரேவிஸுக்கு அதிக தொகை கொடுக்க சிஎஸ்கே அணி நிர்வாகம் தயாராக இருந்ததாக, இந்திய கிரிக்கெட் அணியின் முன்னாள் வீரரும், நடப்பு சீசனில் சிஎஸ்கே அணிக்காக விளையாடியவருமான ரவிச்சந்திரன் அஸ்வின் தனது யூடியூப் சானலில் சில தினங்களுக்கு முன்னர் தெரிவித்திருந்தார்.
இது பெரும் சர்ச்சையை எழுப்பியது. இதையடுத்து சிஎஸ்கே அணி நிர்வாகம் அளித்த விளக்கத்தில், “ஐபிஎல் 2025 சீசனின் நடுவில் டெவால்ட் பிரெவிஸை ஒப்பந்தம் செய்தது அனைத்தும் முறைப்படியே நடைபெற்றது. இதில் எந்த விதியையும் சிஎஸ்கே நிர்வாகம் மீறவில்லை” என்று தெரிவித்திருந்தது.
இதைத் தொடர்ந்து நேற்று ரவிச்சந்திரன் அஸ்வின் கூறியதாவது: டெவால்ட் பிரேவிஸை சிஎஸ்கே அணி ஒப்பந்தம் செய்தது குறித்து அணி நிர்வாகம் விளக்கம் அளித்துள்ளது. எக்ஸ் சமூக வலைதளத்தில் அந்த பதிவை நான் பார்த்தேன். டெவால்ட் பிரேவிஸ் குறித்து நான் பேசிய வீடியோவில் அவரது ஆட்டம் குறித்து மட்டுமே நான் பேசி இருந்தேன். சரியான நேரத்தில் அவரை சிஎஸ்கே அணி ஒப்பந்தம் செய்துள்ளது என்றுதான் நான் கூறி இருந்தேன்.
அந்த வீடியோவை முழுவதுமாக பார்த்தவர்கள் இப்படி கூறுவதற்கு வாய்ப்பில்லை. அந்த வீடியோவின் சில நிமிடங்களை மட்டுமே பார்த்தவர்கள்தான் இவ்வாறு தகவலை திரித்து கூறுகின்றனர்.
இந்த விவகாரத்தின் தலைப்பு எப்படி வந்திருக்க வேண்டுமென்றால் ‘சரியான நேரத்தில் டெவால்ட் பிரேவிஸை ஒப்பந்தம் செய்த சிஎஸ்கே அணி!’ என்றுதான் வந்திருக்க வேண்டும். ஆனால், மாற்றி அர்த்தம் செய்து கொண்டவர்கள் குறித்து எனக்கு எந்த கருத்தும் இல்லை.
டெவால்ட் பிரேவிஸை எந்த தொகைக்கு ஒப்பந்தம் செய்தார்கள் என நான் பேசவில்லை. ஏனென்றால் அந்தத் தகவல் குறித்து எனக்கு தெரியாது. ஆனால், எனக்கு தெரிந்தது எல்லாம் அவரை ஒப்பந்தம் செய்ய வேறு சில அணிகளும் ஆர்வத்துடன் இருந்ததுதான்.
இன்றைய காலத்தில் சரியான விஷயத்துக்கு கூட நாம் விளக்கம் தர வேண்டி உள்ளது. இவ்வாறு அஸ்வின் விளக்கம் அளித்துள்ளார்.
