‘டீல் முடிந்தது’ இந்திய அணியின் அடுத்த தலைமை பயிற்சியாளராக கவுதம் கம்பீர் நியமனம்

நடந்து முடிந்த ஐபிஎல் தொடரில் கொல்கத்தா நைட் ரைடர்ஸ் அணி சாம்பியன் கோப்பையை தட்டிச் சென்றது. ஆரம்பத்தில் இருந்து வலுவாகவே இருந்த கொல்கத்தா அணி, இறுதி வரை பேட்டிங், பந்துவீச்சு, ஃபீல்டிங் என அனைத்திலும் சிறப்பாக செயல்பட்டதால், அந்த அணி கோப்பையை கைப்பற்றியதில் யாருக்கும் பெரிதாக ஆச்சரியம் இல்லை. இப்படி எல்லா வகையிலும் கொல்கத்தா அணி சிறப்பாக செயல்பட அந்த அணியின் ஆலோசகராக இருக்கும் கவுதம் கம்பீர் தான் காரணம் என கொல்கத்தா அணி வீரர்களும், நிர்வாகிகளும் பலமுறை தெரிவித்து வந்தனர்.

இந்நிலையில், பிசிசிஐ நிர்வாகத்தில் இருக்கும் பலரும் கவுதம் கம்பீரை இந்திய கிரிக்கெட் அணியின் தலைமை பயிற்சியாளராக நியமிக்க ஆதரவு தெரிவித்ததோடு, முன்னாள், இன்னாள் வீரர்களும் அவரது பெயரையே பரிந்துரைத்ததாக கூறப்படுகிறது. இதையடுத்து, கவுதம் கம்பீர் தவிர்க்க முடியாத நபராகிவிட்டதால், அவர்தான் அடுத்த பயிற்சியாளர் என்பது கிட்டதட்ட உறுதியாகிவிட்டது. இது குறித்த அறிவிப்பை இந்திய கிரிக்கெட் வாரியம் விரைவில் வெளியிடும் என கூறப்படுகிறது.

.