டல்லாஸ்: ஐசிசி டி 20 கிரிக்கெட் தொடரில் ‘டி’ பிரிவில் நேற்றுமுன்தினம் நடைபெற்ற லீக் ஆட்டத்தில் நேபாளம் அணியை 6 விக்கெட் வித்தியாசத்தில் வீழ்த்தியது நெதர்லாந்து அணி.
அமெரிக்காவின் டல்லாஸ்நகரில் நடைபெற்ற இந்த ஆட்டத்தில் முதலில் பேட் செய்த நேபாளம் அணி 19.2ஓவர்களில் 106 ரன்களுக்கு அனைத்து விக்கெட்களையும்இழந்தது. அதிகபட்சமாக கேப்டன் ரோஹித் பவுடெல் 37 பந்துகளில், 5 பவுண்டரிகளுடன் 35 ரன்கள் சேர்த்தார். கரண் 17, குல்சன்ஹா 14 ரன்கள் எடுத்தனர். மற்றஎந்த பேட்ஸ்மேன்களும் இரட்டை இலக்க ரன்னை எட்டவில்லை. நெதர்லாந்து அணி சார்பில் டிம்பிரிங்கில், லோகன் வான் பீக் ஆகியோர் தலா 3 விக்கெட்களையும் பால் வான் மீகெரென், பாஸ் டி லீட் ஆகியோர் தலா 2 விக்கெட்களையும் கைப்பற்றினர்.
107 ரன்கள் இலக்குடன் பேட் செய்த நெதர்லாந்து அணியானது 18.4 ஓவர்களில் 4 விக்கெட்கள் இழப்புக்கு 109 ரன்கள் எடுத்து வெற்றி பெற்றது. மேக்ஸ் ஓ‘டவுட் 48 பந்துகளில், 4 பவுண்டரிகள், ஒரு சிக்ஸருடன் 54 ரன்களும், பாஸ்டி லீட் 11 ரன்களும் சேர்த்து ஆட்டமிழக்காமல் இருந்தனர். முன்னதாக மைக்கேல் லெவிட் 1, விக்ரம்ஜித் சிங் 22, சைப்ரண்ட் ஏங்கல்பிரெக்ட் 14, ஸ்காட் எட்வர்ட்ஸ் 5 ரன்களில் ஆட்டமிழந்தனர். 6 விக்கெட்கள் வித்தியாசத்தில் வெற்றி கண்டநெதர்லாந்து அணி 2 புள்ளிகளை பெற்றது.
