டிஜிட்டல் அரெஸ்ட் போர்வையில் வீடியோ கால்.. அச்சுறுத்தும் ஆன்லைன் மோசடி கும்பல்… சைபர் க்ரைம் எச்சரிக்கை! | இந்தியா

குறிப்பிட்ட நபரை டார்கெட் வைத்து செல்போன் மூலம் தொடர்பு கொள்ளும் கும்பல், தங்களை சி.பி.ஐ. அதிகாரிகள் என்றும் சம்பந்தப்பட்ட நபரின் செல்போன் எண் சட்டவிரோத செயல்களுக்கு பயன்படுத்தப்பட்டிருப்பதாகவும் கூறி அதிர்ச்சி கொடுப்பார்கள். அது தொடர்பாக உடனே விசாரிக்க வேண்டும் என மிரட்டும் கும்பல், ஒரு மணி நேரத்திற்குள் டெல்லி காவல் நிலையத்தில் ஆஜராகுமாறும் வற்புறுத்துவார்கள்.

ஆனால், “தான் அப்படியொரு எந்த குற்றச்செயல்களிலும் ஈடுபடவில்லை” எனக் கூறி மறுப்பு தெரிவித்தால்…சரி, வீடியோ காலில் விசாரிக்க வேண்டும் எனக்கூறி வாட்ஸ்அப் காலில் வருவார்கள். அப்போது அதிகாரிகளைப் போலத் துருவித் துருவி விசாரித்து, வங்கி ட்ரான்ஸ்சாக்சன்களை சரி பார்க்க வேண்டும் எனக்கூறி, அக்கவுண்ட் விவரங்களை கேட்பார்கள். அதில் எந்த unwanted transaction-னும் நிகழவில்லை என்றால், வழக்கிலிருந்து தங்களை விடுவிக்கிறோம் எனவும் நம்பிக்கை கொடுப்பார்கள்.

அதை உண்மை என நம்பி மர்ம நபர்கள் கேட்ட வங்கிக் கணக்கு விவரங்களைக் கொடுத்தால் அவ்வளவு தான், சுமார் 3 மணி நேரம் டிஜிட்டல் அரெஸ்ட் என்ற போர்வையில் கட்டுக்குள் வைத்து, வங்கிக் கணக்கிலிருந்து மொத்த பணத்தையும் லவுட்டி விடுவார்கள். இப்போதைக்கு உங்கள் அக்கவுண்டை ஃப்ரீஸ் செய்துள்ளோம் ; விசாரணைக்குப் பின்னர் குற்றம் பொய்யான உடனே பணத்தைத் திருப்பி உங்களது வங்கிக் கணக்கிற்கே அனுப்பி விடுவோம் எனக் கூறி அப்போதைக்கு இணைப்பைத் துண்டிப்பார்கள்.

தன் மீதுதான் தவறு இல்லையே பிறகு ஏன் பயப்பட வேண்டும்? என நினைத்து பணத்தைப் பறிகொடுத்தவர்களும் வெளியில் தெரிவிக்காமல் இருப்பார்கள். ஆனால் பல மாதங்களாகியும் பணம் திரும்ப வராத போது இது ஒரு மெகா மோசடி என தெரியவரும். அப்படி ஏராளமான புகார்கள் மத்திய குற்றப்பிரிவு போலீசாரிடம் குவிந்து கிடக்கின்றன.

டிஜிட்டல் அரெஸ்ட் என்ற போர்வையில் கைவரிசை காட்டும் ஆன்லைன் மோசடி கும்பல் பெரும்பாலும் கம்போடியாவில் உள்ள லோகேஷனையே காட்டும். அதில் பல முறை வட மாநில லொகேஷனையும் காட்டும். இதனால் ஆன்லைன் மோசடி கும்பல் கம்போடியா உள்ளிட்ட பல்வேறு பகுதிகளில் பதுங்கி இருப்பதாகவும் சந்தேகிக்கப்படுகிறது. அதில் சிலரை தனிப்படை அமைத்தும் கைது செய்துள்ளனர்.