மம்தானியின் தற்போதைய வாழ்க்கைச் சூழல், அவர் அடுத்து செல்லவிருக்கும் இடத்துடன் முற்றிலும் வேறுபட்டது. அவரும் அவரது மனைவி ரமா துவாஜியும் தற்போது அஸ்டோரியாவில் சுமார் 800 சதுர அடி கொண்ட ஒரு படுக்கை அறை கொண்ட குடியிருப்பில் வசித்து வருகின்றனர்.
இந்தக் குடியிருப்பில் ஒருநாள் காலை குளியலறை ஒழுகியதால், தரையெங்கும் துண்டுகளைப் பரப்பிய அனுபவத்தை அவர் நகைச்சுவையுடன் பகிர்ந்துகொண்டார்.
இந்த எளிய பின்னணியில், நியூயார்க் மேயரின் அதிகாரப்பூர்வ இல்லமான, 226 ஆண்டுகள் பழமையான மற்றும் 11,000 சதுர அடி பரப்பளவு கொண்ட பிரமாண்டமான கிரேசி மாளிகைக்கு (Gracie Mansion) அவர் மாறவுள்ளார்.
ஈஸ்ட் நதி காட்சியுடன், ஃபயர்ப்ளேஸ், பிரமாண்டத் தோட்டம், நிரந்தர சமையல்காரர் போன்ற வசதிகளைக் கொண்ட இந்த மாளிகையில் பாதுகாப்பு வசதிகள் அதிகம் இருப்பதால், பெரும்பாலான மேயர்கள் இங்கு குடியேறுவதே வழக்கம்.
எனினும், தான் எங்கு வசிக்கப் போகிறேன் என்பதை மம்தானி இன்னும் முடிவெடுக்கவில்லை என்று கூறியுள்ளார்.
மம்தானியின் தேர்தல் பிரசாரம், சமூக ஊடகங்கள் மற்றும் பாரம்பரிய அடித்தள மக்கள் இயக்கத்தின் (grassroots movement) மூலமாகத் திரட்டப்பட்ட பல்லாயிரக்கணக்கான தன்னார்வலர்களால் பலப்படுத்தப்பட்டது.
அவரது செய்தி, இந்தி, அரபு மற்றும் ஸ்பானிஷ் போன்ற பல்வேறு மொழிகளில் எடுத்துச் செல்லப்பட்டு, நியூயார்க்கின் பன்முக சமூகங்களிடையே ஆழமாக வேரூன்றியது.
