கோலாலம்பூர், பிப்ரவரி 18, 2026:
ஜோகூர் பாரு மற்றும் சிங்கப்பூர் இடையிலான ‘ரேபிட் டிரான்சிட் சிஸ்டம்’ (RTS) ரயில் சேவைக்கான பயணக் கட்டணங்கள் 2026-ஆம் ஆண்டின் இரண்டாம் பாதியில் அதிகாரப்பூர்வமாக அறிவிக்கப்பட உள்ளன.
ஒரு வழிப் பயணத்திற்கு சுமார் S$5 முதல் S$7 (மலேசிய ரிங்கிட்டில் சுமார் RM15.50 முதல் RM21.70 வரை) வரை கட்டணம் நிர்ணயிக்கப்படலாம் என எதிர்பார்க்கப்படுகிறது.
தலைநகரின் பொதுப் போக்குவரத்து அளவுக்கு இது மலிவாக இருக்காது என்றாலும், காரில் எல்லை தாண்டிச் செல்பவர்களுக்கு இது சிக்கனமானதாக இருக்கும் என்று போக்குவரத்து அமைச்சர் அந்தோணி லோக் தெரிவித்துள்ளார்.
மலேசியாவின் பிரசரானா (Prasarana) மற்றும் சிங்கப்பூரின் எஸ்எம்ஆர்டி (SMRT) ஆகிய நிறுவனங்களின் கூட்டு முயற்சியான ‘RTS Operations’ இந்தக் கட்டணங்களை வணிக ரீதியாக முடிவு செய்யும்.
மேலும் சிங்கப்பூர் அரசு இதற்கென மானியம் வழங்காது என்பதால், இத்திட்டம் நீடித்த நிலையான வளர்ச்சியை உறுதி செய்யும் வகையில் செயல்படும் என்றும், இதற்கு மாதாந்திர பாஸ்கள் அல்லது தள்ளுபடிகள் வழங்குவதில் சிக்கல் உள்ளது என்றும், ஏனெனில் மலேசிய அரசு சிங்கப்பூர் பயணிகளுக்கு மானியம் வழங்க முடியாது என்று குறிப்பிட்டதை அமைச்சர் தெளிவுபடுத்தியுள்ளார்.
