“ஜியோ தனது இலக்கை அடைய உதவியது டிஜிட்டல் இந்தியாதான்” – ஜியோ பங்குப் பட்டியல் விழாவில் பிரதமர் மோடிக்கு அனந்த் அம்பானி நன்றி! | வணிகச் செய்திகள்

இதில் பேசிய ரிலையன்ஸ் இண்டஸ்ட்ரீஸ் இயக்குநர் அனந்த் அம்பானி, ஒவ்வொருவரின் கையிலும் இணையம் இருக்க வேண்டும் மற்றும் ஒவ்வொரு கிராமமும் உலகத்தோடு இணைந்திருக்க வேண்டும் என்ற கனவின் பெயர்தான் ஜியோ என்றார். ஒரு சாதாரண இந்தியராலும் அசாதாரணமான கனவுகளைக் காண முடியும் என்பதை தனது தாத்தா திருபாய் அம்பானி நிரூபித்துக் காட்டியதாகப் பெருமிதம் கூறினார். அப்போது முகேஷ் அம்பானி நெகிழ்ச்சியடைந்தார்.

முன்னதாக, ‘‘டிஜிட்டல் இந்தியா தான் ஜியோவின் இலக்கைத் தீர்மானித்தது’’ என்று பிரதமர் மோடிக்கு அனந்த் அம்பானி நன்றி தெரிவித்தார். பிரதமர் நரேந்திர மோடியின் ‘டிஜிட்டல் இந்தியா’ என்ற தொலைநோக்குப் பார்வையே ஜியோவின் பயணத்திற்கு ஒரு தெளிவான இலக்கைக் கொடுத்தது என்றும் தெரிவித்த அனந்த் அம்பானி இந்தியாவின் டிஜிட்டல் கனவுக்கும், நாடு முழுவதும் இணைய இணைப்பை விரிவுபடுத்தும் ஜியோவின் முயற்சிக்கும் இடையே உள்ள தொடர்பைச் சுட்டிக்காட்டினார்.

அனந்த் அம்பானி தனது பேச்சில், “எங்கள் ஜியோ நிறுவனத்திற்கு ஒரு தெளிவான இலக்கைக் கொடுத்த ‘டிஜிட்டல் இந்தியா’ திட்டத்தின் தொலைநோக்குப் பார்வைக்காகவும், அவரது தொடர் வழிகாட்டுதல் மற்றும் ஆதரவிற்காகவும் நமது மதிப்பிற்குரிய பிரதமர் ஸ்ரீ நரேந்திர தாமோதர்தாஸ் மோடி ஜி அவர்களுக்கு எங்கள் ஆழமான நன்றியைத் தெரிவித்துக் கொள்கிறோம். மதிப்பிற்குரிய மோடி ஜி, உங்களுக்கு எங்கள் கோடான கோடி வணக்கங்கள்!” என்று நெகிழ்ச்சியாகக் கூறினார்.

சிறிய நகரங்கள் மற்றும் கிராமப்புறங்கள் உட்பட இந்தியா முழுவதும் டிஜிட்டல் வசதிகளைக் கொண்டு சேர்ப்பதை நோக்கமாகக் கொண்டே ஜியோவின் பயணம் அமைந்திருப்பதாகக் குறிப்பிட்ட அனந்த் அம்பானி, ஜியோ தொடங்கப்பட்டதன் பின்னணியைப் பற்றி நினைவு கூர்ந்து, “ஒவ்வொருவர் கையிலும் இன்டர்நெட் இருக்க வேண்டும்; ஒவ்வொரு கிராமமும் உலகத்தோடு இணைய வேண்டும் என்பதுதான் நோக்கம். இந்த கனவின் பெயர்தான் ஜியோ” என்று கூறினார்.

இன்றைய சூழலில் கல்வி, தகவல் தொடர்பு, மருத்துவம் மற்றும் டிஜிட்டல் தளங்களைப் பயன்படுத்துவதில் இன்டர்நெட் எவ்வளவு முக்கியமானது என்பதை எடுத்துரைத்த அனந்த் அம்பானியின் உரை, கொரோனா காலத்தில் பள்ளிகள் மூடப்பட்டிருந்த போதும், ஆன்லைன் வசதியால் மாணவர்கள் படிப்பைத் தொடர முடிந்தது என்பதையும் நினைவுபடுத்தியது. அதேபோல், தூரத்தைக் கடந்து குடும்பங்கள் வீடியோ கால் மூலம் இணைப்பில் இருக்க முடிந்ததையும் அவர் விவரித்தார். தொலைதூர இடங்களிலும் மருத்துவச் சேவை கிடைக்க இது உதவுகிறது. உதாரணத்திற்கு, மும்பையில் இருக்கும் ஒரு பெரிய டாக்டர், ராஜஸ்தானின் பாலி கிராமத்தில் உள்ள ஒரு தீவிர நோயாளியைக் காப்பாற்ற ஜியோவின் இணைப்பு வசதி உதவியாக இருக்கிறது. இவை அனைத்தும் இந்தியாவின் டிஜிட்டல் கனவுகளில் ஜியோ எவ்வாறு ஒன்றிணைந்துள்ளது என்பதைக் காட்டுகிறது என்று அவர் கூறினார்.