ஜிம்பாப்வே தொடரிலிருந்து சஞ்சு சாம்சன் அதிரடி நீக்கம்.. சூர்யவன்ஷி உள்ளிட்ட இளம் வீரர்களுக்கு பிசிசிஐ வாய்ப்பு | கிரிக்கெட் செய்திகள்

சஞ்சு சாம்சனுக்கு ஓய்வு அளிக்கப்பட்டதா அல்லது அவர் அணியில் இருந்து நீக்கப்பட்டாரா என்பது குறித்து பிசிசிஐ தனது செய்திக் குறிப்பில் தெளிவாகக் குறிப்பிடவில்லை. தற்சமயம் இங்கிலாந்து சுற்றுப்பயணத்தில் இருக்கும் அக்சர் படேல், ஹர்ஷித் ராணா, வாஷிங்டன் சுந்தர், பிரசித் கிருஷ்ணா, ரவி பிஷ்னோய் ஆகியோருக்கும் இந்த அணியில் இடம் கிடைக்கவில்லை.

வழக்கமாக பிசிசிஐ இளம் வீரர்களைப் பரிசோதிப்பதற்கான ஒரு களமாகவே ஜிம்பாப்வே தொடரைப் பயன்படுத்தி வருகிறது. அந்த வகையில், விதர்பா மற்றும் சன்ரைசர்ஸ் ஹைதராபாத் அணிக்காக விளையாடும் ஸ்பின்னர் ஹர்ஷ் துபே முதன்முறையாக இந்திய டி20 அணியில் சேர்க்கப்பட்டுள்ளார்.

அதேபோல், சமீபத்தில் இலங்கை ஏ அணியுடனான முத்தரப்பு தொடரில் சிறப்பாகச் செயல்பட்ட வேகப்பந்து வீச்சாளர் யாஷ் தாக்கூர் மற்றும் குஜராத் டைட்டன்ஸ் அணியின் உயரமான வேகப்பந்து வீச்சாளர் அசோக் சர்மா ஆகியோருக்கும் முதன்முறையாக தேசிய அணியில் வாய்ப்பு கிடைத்துள்ளது.

பஞ்சாப் கிங்ஸ் அணியின் அதிரடி தொடக்க ஆட்டக்காரரும் விக்கெட் கீப்பருமான பிரப்சிம்ரன் சிங் இந்த தொடரில் விளையாட வாய்ப்பு பெற்றுள்ளார். மேலும், காயத்தால் அவதிப்பட்டு வந்த வேகப்பந்து வீச்சாளர் மயங்க் யாதவ் மற்றும் கொல்கத்தா நைட் ரைடர்ஸ் அணியின் ரிங்கு சிங் ஆகியோர் மீண்டும் இந்திய அணிக்குத் திரும்பியுள்ளனர். இளம் வீரர் வைபவ் சூர்யவன்ஷி தனது இடத்தை அணியில் தக்கவைத்துக் கொண்டுள்ளார்.