ஈப்போ, ஏப் 4 –
மத்திய கிழக்கில் நிலவும் போர் சூழலால் உலகளவில் செலவினங்கள் அதிகரித்துள்ள போதிலும், மக்களுக்கு நேரடியாகப் பயனளிக்கும் திட்டங்கள் எக்காரணம் கொண்டும் நிறுத்தப்படாது என்று பிரதமர் டத்தோஸ்ரீ அன்வார் இப்ராகிம் உறுதியளித்துள்ளார்.
ஈப்போவில் நடைபெற்ற நிகழ்வொன்றில் பேசிய அவர், நாட்டின் தற்போதைய பொருளாதார நிலை குறித்து ஆற்றிய உரையில்,
பெரிய அளவிலான பிரம்மாண்ட மேம்பாட்டுத் திட்டங்கள் தற்காலிகமாக ஒத்திவைக்கப்படலாம். இருப்பினும், சாமானிய மக்களின் தேவைகளான:
• பள்ளி கழிவறைகளைச் சீரமைத்தல் மற்றும் இதர வசதிகளை மேம்படுத்துதல்.
• பள்ளிவாசல் கூரைகளைச் சரிசெய்தல்.
• ஒராங் அஸ்லி பழங்குடியின மக்களுக்கான வீட்டு வசதி மேம்பாடு.
போன்ற திட்டங்கள் முன்னுரிமை அடிப்படையில் செயல்படுத்தப்படும் என்று பிரதமர் தெரிவித்தார்.
மேலும் அதிகரித்து வரும் பயணச் செலவுகளைக் கருத்தில் கொண்டு, அமைச்சர்கள் மற்றும் அரசு உயர் அதிகாரிகள் தற்காலிகமாக வெளிநாட்டுப் பயணங்களைத் தவிர்க்குமாறு அறிவுறுத்தப்பட்டுள்ளதாக அவர் கூறினார்.
முன்பு லண்டன் செல்வதற்கு 7,000 ரிங்கிட்டாக இருந்த விமானக் கட்டணம், தற்போது 20,000 ரிங்கிட் வரை உயர்ந்துள்ளது. இத்தகைய சூழலில் தேவையற்ற செலவுகளைக் குறைப்பது அவசியம்,” என்று அவர் சுட்டிக்காட்டினார்.
எரிபொருள் தட்டுப்பாடு காரணமாக உலகம் முழுவதும் சுமார் 1,000 விமானங்கள் ரத்து செய்யப்பட்டுள்ளதாக நியூசிலாந்து பிரதமர் தன்னிடம் பகிர்ந்துகொண்ட தகவலையும் அன்வார் மேற்கோள் காட்டினார். எரிபொருள் கிடைத்தாலும், போக்குவரத்துச் சிக்கல்களால் விமானப் பயணங்கள் பெரும் சவாலாக மாறியுள்ளன.
சர்வதேச அளவில் நிச்சயமற்ற சூழல் நிலவினாலும், மலேசியாவின் பொருளாதாரம் 2025-இல் 5.2% வளர்ச்சியைப் பதிவு செய்துள்ளது. பணவீக்கம் 1.4 விழுக்காடாகக் கட்டுப்படுத்தப்பட்டுள்ளது. இந்த இக்கட்டான நிலையிலும் கல்வித்துறைக்கான முக்கியத்துவம் ஒருபோதும் குறையாது என்றும், மாணவர்களின் நலன் காக்கப்படும் என்றும் பிரதமர் உறுதிபடத் தெரிவித்தார்.
