சென்னை: சென்னை கிராண்ட் மாஸ்டர்ஸ் செஸ் போட்டியின் 2-வது பதிப்பு சென்னை கோட்டூர்புரத்தில் உள்ள அண்ணா நூற்றாண்டு நூலகத்தில் நடைபெற்று வருகிறது. தொடரின் 2-வது நாளான நேற்று 2-வது சுற்று போட்டிகள் நடைபெற்றன. இதில் மாஸ்டர்ஸ் பிரிவு 2-வது சுற்றில் ஈரான் கிராண்ட் மாஸ்டரான அமீன் தபதாபேயி, செர்பிய கிராண்ட் மாஸ்டரான அலெக்ஸி சரானா மோதினார்கள். இதில் அமீன் தபதாபேயி 45-வது நகர்த்தலின் போது வெற்றி கண்டார்.
இந்திய கிராண்ட் மாஸ்டரான அர்ஜுன் எரிகைசி, அமெரிக்க கிராண்ட் மாஸ்டரான லெவோன் அரோனியனை எதிர்கொண்டார். இதில் வெள்ளை நிற காய்களுடன் அர்ஜுன் எரிகைசி விளையாடினார். இந்த ஆட்டம் 36-வதுநகர்த்தலின் போது டிராவில் முடிவடைந்தது.
இந்திய கிராண்ட் மாஸ்டரான விதித்குஜ்ராத்தி, ஈரான்கிராண்ட் மாஸ்டரான பர்ஹாம் மக்சூட்லூவுடன் மோதினார். இதில் விதித் குஜ்ராத்தி 45-வது காய் நகர்த்தலின் போது தோல்வி அடைந்தார். இது அவருக்கு 2-வது தோல்வியாக அமைந்தது. முதல் ஆட்டத்தில் விதித் குஜ்ராத்தி, அர்ஜுன் எரிகைசியிடம் வீழ்ந்திருந்தார்.
இந்திய கிராண்ட் மாஸ்டரான அரவிந்த் சிதம்பரம், பிரான்ஸ் கிராண்ட்மாஸ்டரான மாக்சிம் வாச்சியர் லாக்ரேவ்வுடன் பலப்பரீட்சை நடத்தினார். இதில் அரவிந்த் சிதம்பரம் 23-வது நகர்த்தலின் போது ஆட்டத்தை டிரா செய்தார்.
7 சுற்றுகள் கொண்ட இந்த தொடரில் 2 சுற்றுகளின் முடிவில் மாக்சிம் வாச்சியர் லாக்ரேவ், அமீன் தபதாபேயி,அர்ஜுன் எரிகைசி ஆகியோர் தலா 1.5 புள்ளிகளுடன் முதலிடத்தை பகிர்ந்து கொண்டுள்ளனர். அரவிந்த் சிதரம்பரம், லெவோன் அரோனியன், பர்ஹாம்மக்சூட்லூ ஆகியோர் தலா ஒருபுள்ளியுடன் முறையே 4 முதல் 6-வது இடங்களில் உள்ளனர். அலெக்ஸி சரானா 0.5 புள்ளிகளுடன் 7-வது இடத்தில் உள்ளார்.
சாலஞ்சர்ஸ் பிரிவில் 2-வது நாளான நேற்று 2-வது சுற்று ஆட்டங்கள் நடைபெற்றன. இதில் முதல் போர்டில் லியோன் மெண்டோன்கா, ஹரிகா துரோண வல்லியுடன் மோதினார். கருப்பு நிற காய்களுடன் விளையாடிய ஹரிகா துரோணவல்லி 44-வது நகர்த்தலின் போது அதிர்ச்சி தோல்வி அடைந்தார்.
அபிமன்யு புராணிக், பிரணவை எதிர்கொண்டார். கருப்பு நிற காய்களுடன் விளையாடிய பிரணவ் 39-வது நகர்த்தலின் போது வெற்றி பெற்றார். கார்த்திக்கேயன் முரளி, பிரனேஷுடன் பலப்பரீட்சை நடத்தினார். இந்த ஆட்டம் 33-வது நகர்த்தலின் போது டிரா ஆனது.
ஆர்.வைஷாலி, ரவுனக் சத்வானியை சந்தித்தார். இதில் வெள்ளை நிற காய்களுடன் விளையாடிய வைஷாலி 30-வது காய் நகர்த்தலின் போது ஆட்டத்தை டிரா செய்தார்.
