‘செக்மேட்’ செஸ் போட்டி… குகேஷை வீழ்த்தியதும் அவரது ‘ராஜா’-வை வீசிய அமெரிக்க வீரர்! | விளையாட்டு

செஸ் போட்டியில் உலக சாம்பியன் குகேஷை வீழ்த்தியதும் அவரது ராஜாவை அமெரிக்க வீரர் நகமுரா தூரமாக வீசி எறிந்தது சர்ச்சையை ஏற்படுத்தி உள்ளது.

தமிழகத்தைச் சேர்ந்த கிராண்ட் மாஸ்டர் குகேஷ். பல போட்டிகளில் வென்றுள்ள குகேஷ் சமீபத்தில் சந்தித்த நெருடலான சம்பவம் இணையங்களில் விவாதப் பொருளாகியுள்ளது. அமெரிக்காவின் ஆர்லிங்டன் நகரில் “செக்மேட்” செஸ் போட்டி நடைபெறுகிறது. தொடக்கச் சுற்றில் இந்திய அணியும், அமெரிக்க அணியும் மோதின. இதில் ஐந்துக்கு பூஜ்ஜியம் என்ற கணக்கில் இந்தியாவை வீழ்த்தி அமெரிக்க அதிர்ச்சிக்குள்ளாக்கியது. அர்ஜுன் எரிகேசி, திவ்யா தேஷ்முக், குகேஷ் உள்ளிட்ட அனைவரும் தோல்வியைத் தழுவினர்.

அவர்கள் அனைவரின் தோல்வியின் போதும் ஆட்டத்தில் அமைதி நிலவியது. ஆனால் தமிழக வீரரும் உலக சாம்பியனுமான குகேஷை வீழ்த்தியபோது அமெரிக்க வீரர் நகமுராவின் செய்கை அதிர்ச்சியை ஏற்படுத்தியது. அவர் வென்றதும் ஆவேசமாக குகேஷின் போர்டில் இருந்த ராஜாவை எடுத்து பார்வையாளர்கள் மத்தியில் வீசி எறிந்தார்.

அவரின் இந்தச் செயலை அவரது அணியினர் வரவேற்றதுடன் நகமுராவுடனே சேர்ந்து தாங்களும் வேடிக்கை கொண்டாட்டங்களில் ஈடுபட்டனர். இதைப் பார்த்து குகேஷ் திடுக்கிட்டார். அவரை இந்திய அணியினர் சமாதானப்படுத்தினர்.