சவூதி தலைநகர் ரியாத்தில் உள்ள கிங் காலித் சர்வதேச விமான நிலையம் மீது நடத்தப்பட்ட தாக்குதலில் 12 பேர் உயிரிழந்துள்ளதுடன், 309 பேர் காயமடைந்துள்ளனர்.
சவூதி அரேபியாவின் தலைநகர் ரியாத்தில் அமைந்துள்ள சர்வதேச விமான நிலையத்தின் மீது மேற்கொள்ளப்பட்ட தாக்குதலில் குறைந்தது 12 பேர் உயிரிழந்துள்ளதுடன், 309 பேர் காயமடைந்துள்ளதாக அந்நாட்டு அதிகாரிகள் தெரிவித்துள்ளனர். ஏமனின் ஹூதி கிளர்ச்சியாளர்கள் முன்னதாக பல தாக்குதல்களுக்கு பொறுப்பேற்றிருந்த நிலையில் இச்சம்பவம் இடம்பெற்றுள்ளது.
உயிரிழந்தவர்களில் நால்வர் சவூதி பிரஜைகள் என்பதுடன், பங்களாதேஷைச் சேர்ந்த இருவரும் அமெரிக்கா, ஜோர்தான், பலஸ்தீனம், சிரியா, சூடான் மற்றும் எகிப்து ஆகிய நாடுகளைச் சேர்ந்த தலா ஒருவரும் அடங்குவதாக சவூதி சிவில் விமானப் போக்குவரத்து அதிகார சபை அறிவித்துள்ளது.
இத்தாக்குதலைத் தொடர்ந்து கிங் காலித் சர்வதேச விமான நிலையத்தின் விமான சேவைகள் யாவும் தற்காலிகமாக இடைநிறுத்தப்பட்டுள்ளன என பிபிசி செய்தி குறிப்பிட்டுள்ளது.
பயணிகள் முனையமொன்றை இலக்கு வைத்து நடத்தப்பட்ட இத்தாக்குதலில் பொதுமக்கள் மற்றும் விமான நிலைய ஊழியர்கள் பாதிக்கப்பட்டுள்ளதாக சவூதி தலைமையிலான இராணுவக் கூட்டமைப்பின் பேச்சாளர் மேஜர் ஜெனரல் துர்கி அல்-மாலிகி தெரிவித்துள்ளார். அத்துடன், இத்தாக்குதலை ஹூதிகளே முன்னெடுத்துள்ளதாக குற்றம் சுமத்தியுள்ள சவூதி கூட்டமைப்பு, இதனை ஒரு போர்க்குற்றம் எனக் குறிப்பிட்டு, இதற்கு எதிராக தக்க பதிலடி கொடுக்கப்படும் எனவும் சூளுரைத்துள்ளது.
காயமடைந்தவர்களில் சிலரது நிலைமை மிகவும் கவலைக்கிடமாக உள்ளதாகவும், விமான நிலையத்துக்கு ஏற்பட்டுள்ள சேத விவரங்கள் மதிப்பீடு செய்யப்பட்டு வருவதாகவும் அதிகார சபை தெரிவித்துள்ளது.
உள்நாட்டு முனையத்தில் இருந்த 401ஆம் இலக்க நுழைவாயில் தாக்கப்பட்டதாகவும், பலர் கண்முன்னே காயமடைந்த நிலையில் மக்கள் பதறியடித்து ஓடியதாகவும் நேரில் கண்ட சாட்சியங்கள் தெரிவித்துள்ளன. மேலும் பல அம்பியூலன்ஸ் வண்டிகள் விமான நிலையத்தை நோக்கி விரைந்ததை ரொய்ட்டர்ஸ் செய்திச் சேவை உறுதிப்படுத்தியுள்ளது.
இதேவேளை, சவூதி அரேபியாவின் கிழக்கு மாகாணத்தில் உள்ள தம்மாம் மன்னர் பஹத் சர்வதேச விமான நிலையத்துக்கு அருகிலும் எறிகணை ஒன்று வீழ்ந்துள்ளதாக சவூதி கூட்டமைப்பு குறிப்பிட்டுள்ளது. முன்னதாக, ஹூதிகளால் நடத்தப்பட்ட இருவேறு தாக்குதல்களில் விமானி ஒருவர் உட்பட மூன்று சவூதியர்கள் கொல்லப்பட்டிருந்த நிலையில், அடுத்தடுத்து இத்தாக்குதல்கள் தீவிரமடைந்துள்ளன.
இச்சம்பவத்தில் அமெரிக்க பிரஜை ஒருவர் கொல்லப்பட்டதை உறுதிப்படுத்தியுள்ள அமெரிக்க இராஜாங்கச் செயலாளர் மார்கோ ரூபியோ, இத்தாக்குதலை வன்மையாகக் கண்டித்துள்ளார்.
நிலைமை சீரடையும் வரை அப்பகுதியைத் தவிர்க்குமாறு பிரித்தானியா மற்றும் கனடா உள்ளிட்ட மேற்கத்திய தூதரகங்கள், தமது பிரஜைகளுக்கு அறிவுறுத்தியுள்ளதுடன், குவைத் எயார்வேஸ் உள்ளிட்ட வளைகுடா விமான நிறுவனங்கள் பல தமது சேவைகளை ரத்துச் செய்துள்ளன. ரியாத் நோக்கிய அனைத்து விமானங்களும் மாற்றுப் பாதைகளுக்கு திருப்பப்பட்டுள்ளதுடன் அல்லது இடைநிறுத்தப்பட்டுள்ளன.
ஏமன் உள்நாட்டுப் போரில் அரசுப் படைகளுக்கு சவூதி அரேபியா வழங்கி வரும் ஆதரவுக்கு எதிராகவே தாம் இந்நடவடிக்கைகளை முன்னெடுப்பதாக ஹூதிகள் தெரிவித்துள்ளனர்.
ஏமனில் செங்கடல் கரையோரப் பகுதிகள் மற்றும் பாப் அல்-மந்தாப் நீரிணை ஆகிய முக்கிய பகுதிகளை ஹூதிகள் கைப்பற்றியதை அடுத்து மோதல்கள் தீவிரமடைந்துள்ளன.
2022ஆம் ஆண்டு ஏற்படுத்தப்பட்ட தற்காலிக போர் நிறுத்தம் கடந்த ஜூலை மாதம் முறிந்ததைத் தொடர்ந்து, ஹூதிகள் சவூதி விமான நிலையங்கள், எண்ணெய் சுத்திகரிப்பு நிலையங்கள் மற்றும் கப்பல்கள் மீது தொடர்ச்சியாக ஏவுகணை மற்றும் ட்ரோன் தாக்குதல்களை மேற்கொண்டு வருகின்றனர்.
