கோர விபத்தில் சிக்கிய பாஜக வேட்பாளர்… பிரசாரம் முடிந்து வீடு திரும்பும்போது மேற்குவங்கத்தில் நடந்த அதிர்ச்சி சம்பவம்! | India News (இந்தியா செய்திகள்)

இரண்டு கட்சிகளும் தங்கள் வேட்பாளர்களை அறிவித்து, தீவிர தேர்தல் பிரசாரத்தில் ஈடுபட்டுவருகின்றனர். இந்நிலையில், பாஜக பெண் வேட்பாளர் கோரமான விபத்தில் சிக்கியிருக்கிறார். இது பெரும் பரபரப்பை ஏற்படுத்தியுள்ளது.

மேற்குவங்கம் மாநிலம், கூச் பெஹார் மாவட்டம், ஷீதல்குச்சி சட்டமன்றத் தொகுதி பாஜக வேட்பாளராக சாவித்ரி பர்மன் அறிவிக்கப்பட்டு, அவர் களத்தில் தீவிர பிரசாரத்தில் ஈடுபட்டுவருகிறார். அந்த வகையில் அவர், மதாபங்கா எனும் பகுதியில் தனது பிரசாரத்தை மேற்கொண்டுவிட்டு, தனது காரில் வீட்டிற்கு இரவு திரும்பிக்கொண்டிருந்தார்.

அந்த சமயத்தில், ஷிகார்பூர் எனும் கிராமத்தின் அருகே வந்துகொண்டிருந்தபோது, சாலையின் எதிர்புறத்தில் வந்துகொண்டிருந்த லாரி ஒன்று, அவரது காரின் மீது மோதும்படி வந்துள்ளது. அதில் இருந்து தப்பிக்க டிரைவர் காரை திருப்பியபோது, ஓட்டுநரின் கட்டுப்பாட்டை இழந்த கார் அருகே இருந்த கால்வாயில் கவிழ்ந்துள்ளது.

இது கார் பலத்த சேதம் அடைந்த நிலையில், கார் ஓட்டுநரும், காருக்குள் இருந்த பாஜக வேட்பாளர் சாவித்ரி பர்மனுக்கும் காயம் ஏற்பட்டுள்ளது. உடனடியாக அவரை மீட்ட கட்சியினர், அவரையும், ஓட்டுநரையும் அருகில் உள்ள மருத்துவமனைக்கு அழைத்துச் சென்றனர். தற்போது அங்கு அவர்கள் சிகிச்சையில் இருந்துவருகின்றனர்.

இந்த விபத்து குறித்து பேசிய வேட்பாளர் சாவித்ரி பர்மன், “எதிர்திசையில் இருந்து அதிவேகமாக வந்த ஒரு லாரி திடீரென எங்கள் காருக்கு முன்னால் வந்தது. ஓட்டுநர் அதைத் தவிர்க்க முயன்றபோது, கார் கட்டுப்பாட்டை இழந்து கால்வாயில் விழுந்தது” எனத் தெரிவித்துள்ளார்.

அதே சமயம், இந்த விபத்து குறித்து பேசும் அவரது ஆதரவாளர்களும், கட்சியினரும், இது திட்டமிட்ட சதியோ எனும் கேள்வியும், அச்சமும் எழுவதாக தெரிவித்துள்ளனர். விபத்து குறித்து மதாபங்கா காவல்துறையினர் வழக்குப் பதிவு செய்து விசாரணை நடத்திவருகின்றனர். விசாரணைக்குப் பிறகே விபத்துக்கான காரணம் தெரியவரும் என காவல்துறை தரப்பில் இருந்து சொல்லப்பட்டுள்ளது.