கூகுள் மேப் காட்டிய வழி.. ஓடையில் இறங்கிய கார்.. சிக்கிய கேரள தம்பதி.. அடுத்து நடந்தது என்ன?

கேரள மாநிலத்தின் கோட்டயம் பகுதியைச் சேர்ந்த ஒரு வயதான தம்பதியினர் கூகுள் மேப்ஸ் வழங்கிய தவறான வழிகாட்டுதலின் காரணமாக தங்களுடைய காரோடு ஓடைக்குள் விழுந்து நூல் இழையில் உயிர் தப்பிய சம்பவம் அப்பகுதி மக்களிடையே பரபரப்பை ஏற்படுத்தியுள்ளது. இந்த விபத்து கடந்த புதன்கிழமை அன்று காலை 11 மணி அளவில் நடைபெற்றது. 62 வயதான ஜோசி ஜோசப் என்பவரும் அவருடைய 58 வயது மனைவி ஷீபாவும் மண்வெட்டாம் பகுதியில் உள்ள ஜோசியின் நண்பர் வீட்டிற்கு தங்களுடைய காரில் பயணித்துள்ளனர். காரை GPS வழங்கிய வழிகாட்டுதல்களின் பெயரில் இயக்கிக் கொண்டிருந்தபோது திடீரென்று சாலை முடிவடைந்து ஒரு ஓடைக்குள் காரோடு விழுந்துவிட்டனர்.

அப்பகுதி மக்கள் மற்றும் அருகில் இருந்த டிம்பர் மில்லைச் சேர்ந்த ஊழியர்கள் உடனடியாக சம்பவ இடத்திற்கு வந்து மீட்புப் பணியில் ஈடுபட்டனர். அறிக்கைகளின் படி, அந்த ஓடைக்கு அருகில் பல்வேறு எச்சரிக்கை பலகைகள் வைக்கப்பட்டு இருப்பதாகவும், எனினும் பல ஓட்டுனர்கள் முழுக்க முழுக்க GPS வழிகாட்டுதலை மட்டுமே கவனித்து, இது மாதிரியான விபத்தில் மாட்டிக் கொள்வதாகவும் கூறப்படுகிறது. எச்சரிக்கையாக இருப்பதோடு மட்டுமல்லாமல், டிஜிட்டல் வரைபடங்களை மட்டுமே நம்பி இருக்கக் கூடாது. அதிலும் குறிப்பாக, இது மாதிரியான அடிக்கடி வெள்ளம் ஏற்படக்கூடிய பகுதிகளில் கூடுதல் எச்சரிக்கையாக இருப்பது அவசியம் என்று அதிகாரிகள் கூறுகின்றனர்.