கிராமப்புற விவசாயக் குடும்பங்களின் நிலை குறித்த கணக்கெடுப்பு… மண்டல பயிற்சி மாநாடு ஜூன் 11 அன்று தொடக்கம் | Agriculture News (விவசாய செய்திகள்)

இதற்கு முன்னதாக, ஜெய்ப்பூரில் கடந்த மே 21, 22 ஆகிய தேதிகளில் தேசிய அளவில் பயிற்றுநர்களுக்கான பயிற்சிப் பட்டறை நடத்தப்பட்டது. அதன் தொடர்ச்சியாக, சென்னை மண்டல அலுவலகத்தின் கீழ் உள்ள வேலூர், கடலூர், புதுச்சேரி ஆகிய துணை மண்டல அலுவலகங்களைச் சேர்ந்த அதிகாரிகள் பங்கேற்கும் இந்த மண்டல அளவிலான பயிற்சி மாநாட்டை சென்னை மண்டல அலுவலகத் துணைத் தலைமை இயக்குநர் திரு மனோகர் தொடங்கி வைக்கவுள்ளார். சென்னை மண்டல அலுவலக இணை இயக்குநர் டாக்டர் சந்திரசேகர் வரவேற்புரை ஆற்றவுள்ளார். இதன் தொழில்நுட்ப அமர்வுகளை உதவி இயக்குநர் திரு எஸ் சங்கர் கணேஷ், மூத்த புள்ளியியல் அலுவலர்கள் திரு ஏ கருணைமுருகன், திரு ஆஷிஷ் சர்மா ஆகியோர் நடத்தவுள்ளனர்.

இந்த ஆய்வானது இந்தியக் குடும்பங்களின் சொத்துக்கள், மூலதன உருவாக்கம், கடன் நிலைமைகள் குறித்த விரிவான புள்ளிவிவரங்களைச் சேகரிப்பதை முதன்மை நோக்கமாகக் கொண்டுள்ளது. மேலும், கிராமப்புறங்களில் உள்ள விவசாயக் குடும்பங்களின் நில உடைமை, கால்நடை விவரங்கள், அவர்களின் மாதாந்திர வருமானம், செலவினங்கள் போன்ற பல்வேறு வாழ்வாதாரக் காரணிகளை மதிப்பிடுவதற்காக இக்கள ஆய்வு நடத்தப்படவுள்ளது. தேசிய புள்ளியியல் அலுவலகம் இந்த விரிவான தேசிய அளவிலான கள ஆய்வினை வரும் 2026 ஜூலை 1 முதல் 2027 ஜூன் 30 வரையிலான ஓராண்டு காலகட்டத்தில் நாடு முழுவதும் நடத்தத் திட்டமிட்டுள்ளது.

எனவே, பொதுமக்கள் அனைவரும் கள அதிகாரிகளிடம் முறையான, உண்மையான விவரங்களை அளித்து, இந்தத் தேசிய ஆய்வுக்கு தங்களின் முழு ஒத்துழைப்பை அளிக்குமாறு கேட்டுக்கொள்ளப்படுகிறார்கள். பொதுமக்கள் வழங்கும் இந்தப் புள்ளிவிவரங்கள் நம் நாட்டின் கட்டமைப்பு  மேம்பாட்டு நடவடிக்கைகளுக்கும், எதிர்கால வளர்ச்சிக்கும் பெரிதும் வழிவகுக்கும்.