காலி அம்பலன்வத்த பகுதியில் எயார் ரைபிள் ரக துப்பாக்கி வெடித்ததில் படுகாயமடைந்த 57 வயதுடைய பெண் கராப்பிட்டிய வைத்தியசாலையில் அனுமதிக்கப்பட்ட பின்னர் உயிரிழந்துள்ளார்.
காலி பொலிஸ் பிரிவிற்குட்பட்ட அம்பலன்வத்த பகுதியில் எயார் ரைபிள் ரக காற்றுத் துப்பாக்கி இயங்கியதில் படுகாயமடைந்த பெண் ஒருவர் சிகிச்சை பலனின்றி உயிரிழந்துள்ளார்.
நேற்று நண்பகல் வேளையில் இத்துப்பாக்கி வெடித்ததில் காயமடைந்த குறித்த பெண் உடனடியாக கராப்பிட்டிய போதனா வைத்தியசாலையில் அனுமதிக்கப்பட்ட பின்னர் உயிரிழந்துள்ளதாக பொலிஸார் தெரிவித்துள்ளனர்.
இவ்வாறு உயிரிழந்தவர் தெனியாய பிரதேசத்தைச் சேர்ந்த 57 வயதுடைய பெண் என அடையாளம் காணப்பட்டுள்ளார்.
உயிரிழந்த பெண் மற்றுமொரு பெண்ணுடனும் இரு ஆண்களுடனும் இணைந்து மவுண்ட்ஹோல்வத்த பகுதியில் உள்ள வீடு ஒன்றில் பணியாற்றி வந்துள்ளார்.
இதன்போது நேற்று நண்பகல் வேளையில் அங்கிருந்த எயார் ரைபிள் ரக துப்பாக்கி தற்செயலாக இயங்கியதில் இந்த விபத்து நேர்ந்துள்ளதாக ஆரம்பக்கட்ட விசாரணைகளில் தெரியவந்துள்ளது.
இச்சம்பவம் தொடர்பில் சந்தேகத்தின் பேரில் அதே வீட்டில் பணிபுரிந்த மற்றொரு பெண்ணை காலி பொலிஸார் கைது செய்துள்ளதுடன், மேலதிக விசாரணைகளை முன்னெடுத்து வருகின்றனர்.
