கார் வாங்குபவர்களுக்கு குட் நியூஸ்.. பண்டிகை கால சலுகையாக வட்டி விகிதங்களை குறைத்த பாங்க் ஆஃப் பரோடா! | வணிகம்

பண்டிகை காலத்தை முன்னிட்டு, பாங்க் ஆஃப் பரோடா (BoB) தனது கார் மற்றும் அடமானக் கடன்களுக்கான வட்டி விகிதங்களில் முக்கிய குறைப்பை அறிவித்துள்ளது. இந்த நடவடிக்கை, வாடிக்கையாளர்களுக்கு எளிதான நிதியுதவி வாய்ப்புகளுக்கான வழிகளைத் திறக்கிறது. பண்டிகை காலத்தை முன்னிட்டு, பாங்க் ஆஃப் பரோடா வங்கி வட்டி விகிதங்களில் முக்கிய குறைப்பை அறிவித்துள்ளது. கார் வாங்க விரும்புவோர் இதன்மூலம் பயனடையலாம். வங்கி வெளியிட்டுள்ள அறிவிப்பின்படி, ஆட்டோ கடன் விகிதங்கள் 25 அடிப்படை புள்ளிகள் குறைக்கப்பட்டு, தற்போது 8.15% ஆக நிர்ணயிக்கப்பட்டுள்ளன. கூடுதலாக, பரோடா அடமானக் கடன் (Loan Against Property) விகிதங்கள் 60 அடிப்படை புள்ளிகள் குறைக்கப்பட்டு, 9.15% ஆக உள்ளது. இந்த மாற்றங்கள் உடனடியாக அமலுக்கு வருவதாக வங்கி அறிவித்துள்ளது.

இந்திய ரிசர்வ் வங்கியின் நாணயக் கொள்கைக் குழு (MPC) கடந்த பிப்ரவரி மாதம் முதல் ரெப்போ விகிதத்தை 100 அடிப்படை புள்ளிகள் வரை குறைத்த நிலையில், பாங்க் ஆஃப் பரோடாவின் இந்த அறிவிப்பு அதன் தொடர்ச்சியாக வந்துள்ளது. தற்போதைய ரெப்போ விகிதம் 5.5% ஆக உள்ளது என்பது குறிப்பிடத்தக்கது.

அதே நேரத்தில், பேங்க் ஆஃப் பரோடாவின் அடமானக் கடன் சலுகை தற்போது இன்னும் கவர்ச்சிகரமாக மாறியுள்ளது. வாடிக்கையாளர்கள் தங்கள் சிபில் மதிப்பெண்ணைப் பொறுத்து, 55 முதல் 300 அடிப்படை புள்ளிகள் வரையிலான வட்டி குறைப்புகளின் மூலம் பயன் பெறலாம் என்று வங்கி அதிகாரிகள் தெரிவித்துள்ளனர்.

நவராத்திரி முதல் தொடங்கும் பண்டிகை காலத்தை முன்னிட்டு வாடிக்கையாளர்களுக்கு பல்வேறு சலுகைகளை வழங்க வங்கிகள், இ-காமர்ஸ் தளங்கள் மற்றும் உற்பத்தியாளர்கள் தயாராகி வருகின்றனர். ஜிஎஸ்டி பலன்களும் சேர்ந்து, சந்தையில் விற்பனை அதிகரிக்க நிறைய வாய்ப்பிருப்பதாக எதிர்பார்க்கப்படுகிறது.