இலங்கையின் தனித்துவமான காட்டு யானைகளில் ஒன்றான கவன்திஸ்ஸ யானை உயிரிழந்துள்ளது. பிரம்மாண்டமான உடலமைப்பும் நீண்ட தந்தங்களும் கொண்ட இந்த யானை, வனவிலங்கு ஆர்வலர்கள் மற்றும் பாதுகாப்பாளர்கள் மத்தியில் தனித்துவமான இடத்தைப் பெற்றிருந்தது.
துப்பாக்கிச் சூட்டுக் காயத்துக்குள்ளாகி சுமார் ஒரு மாதகாலமாக கால்நடை மருத்துவர்களின் சிகிச்சை பெற்று வந்த கவன்திஸ்ஸ யானை உயிரிழந்துள்ளதாக எதிர்க்கட்சித் தலைவர் சஜித் பிரேமதாச அறிவித்துள்ளார்.
சுமார் 50 முதல் 60 வயதுக்கு இடைப்பட்டதாகக் கருதப்படும் இந்த யானை, ஏறத்தாழ 11 அடி உயரம் கொண்டது. இதன் தந்தங்கள் ஆறு அடிக்கும் அதிகமான நீளத்தைக் கொண்டிருந்தன. இலங்கையில் உயிருடன் இருந்த உயரமான காட்டு யானைகளில் ஒன்றாக இது கருதப்பட்டது. (a)
