ஈப்போ:
தைப்பிங் அருகே உள்ள கமுந்திங், தாமான் அஜிசுல் ரகுமான் (Taman Azizul Rahman) பகுதியில் உள்ள ஒரு வீட்டில், மூதாட்டி ஒருவர் உயிரிழந்த நிலையில் மீட்கப்பட்டுள்ளார்.
இன்று (ஜனவரி 3, 2026) மதியம் 1.05 மணியளவில், கமுந்திங்கில் உள்ள ஒரு வீட்டின் கதவை உடைத்து உள்ளே நுழைய போலீஸார் தீயணைப்புத் துறையின் உதவியை நாடினர்.
தகவலறிந்து மதியம் 1.13 மணிக்கு சம்பவ இடத்திற்கு வந்த கமுந்திங் தீயணைப்பு மற்றும் மீட்பு நிலைய (BBP) வீரர்கள், சிறப்பு ‘பாராடெக்’ (Paratech) உபகரணங்களைப் பயன்படுத்தி வீட்டின் கதவை உடைத்தனர். அங்கு வீட்டின் வரவேற்பு அறையில் (Living room) 64 வயது மதிக்கத்தக்க பெண்மணி ஒருவர் சுயநினைவின்றி கிடப்பதைக் கண்டனர்.
சம்பவ இடத்திற்கு வந்த சுகாதார அமைச்சின் மருத்துவ அதிகாரிகள், அந்த மூதாட்டி ஏற்கனவே உயிரிழந்துவிட்டதை உறுதிப்படுத்தினர்.
“வீட்டின் கதவு உட்புறமாகப் பூட்டப்பட்டிருந்தது. நாங்கள் கதவை உடைத்து உள்ளே சென்றபோது மூதாட்டி சடலமாக மீட்கப்பட்டார். மீட்புப் பணிகள் மதியம் 1.56 மணியளவில் முழுமையாக நிறைவடைந்தன” என்று, பேராக் மாநிலத் தீயணைப்பு மற்றும் மீட்புத் துறை (JBPM) உதவி இயக்குநர் ஷாஸ்லீன் முகமட் ஹனாஃபியா தெரிவித்தார் .
உயிரிழந்த மூதாட்டியின் உடல் மேலதிக விசாரணை மற்றும் பிரேதப் பரிசோதனைக்காகப் போலீஸாரிடம் ஒப்படைக்கப்பட்டுள்ளது. அவர் இயற்கை மரணமடைந்தாரா அல்லது வேறு ஏதேனும் காரணங்கள் உள்ளனவா என்பது குறித்து போலீஸார் விசாரணை நடத்தி வருகின்றனர்.
