கண் இமைக்கும் நேரத்தில் டெல்லியை புரட்டிய மழையும் காற்றும்.. வானத்தில் குலுங்கிய விமானம்!

டெல்லியில் வெயில் கொளுத்திவந்த நிலையில், இன்று மாலை திடீரென வானிலை மாறி கடுமையான காற்று வீசியது. டெல்லியின் சஃப்தர்ஜங் உள்ளிட்ட பகுதிகளில் மணிக்கு 72 முதல் 79 கி.மீ வேகத்தில் காற்று வீசியுள்ளது. மேலும், டெல்லியின் என்.சி.ஆர். பகுதிகளிலும் கடும் காற்று வீசி, மழையும் பலமாக பெய்தது. இதனால், வாகன ஓட்டிகள் கடும் அவஸ்தைக்கு ஆளாகினர்.

காற்றின் வேகம் அதிகமாக இருந்ததால் புழுதி புயலாக இருந்தது. அதேசமயம், மழையும் பெய்ய ஆரம்பிக்க வாகன ஓட்டிகளுக்கு சாலையில் வாகனத்தை இயக்குவதே கடினமாக மாறியது. மேலும், காற்றின் வேகம் அதிகமாக இருந்ததால், விமானம் ஒன்று வானத்திலேயே குலுங்கியது. இது தொடர்பான காட்சிகளும் தற்போது சமூகவலைதளங்களில் வைரலாகிவருகிறது.

கடும் மழை, காற்றால் டெல்லியில் இருந்து புறப்படும் விமானச் சேவையும், டெல்லியில் தரையிறங்க வேண்டிய விமானச் சேவைகளும் பாதிக்கப்பட்டு, புறப்பாடு, தரையிறக்கம் இரண்டிலும் காலதாமதம் ஏற்பட்டது.