கடைசி ஓவர்களில் தோனி களம் இறங்குவது ஏன்? விமர்சனங்களுக்கு பயிற்சியாளர் ஃப்ளெமிங் விளக்கம்…

ஐபிஎல் கிரிக்கெட் தொடரில் சென்னை அணியின் முன்னாள் கேப்டனும், நட்சத்திர ஆட்டக்காரருமான தோனி கடைசி ஓவர்களில் களமிறங்கி சிக்சரும், பவுண்டரியுமாக விளாசி ஆட்டத்தின் போக்கையே மாற்றி வருகிறார். அவர் ஏன் முன்கூட்டியே களமிறங்க கூடாது என்று விமர்சனங்கள் எழுந்த நிலையில் அது குறித்து சென்னை அணி பயிற்சியாளர் ஸ்டீபன் ஃப்ளெம்மிங் விளக்கம் அளித்துள்ளார்.

ஐபிஎல் கிரிக்கெட் தொடர் தற்போது விறுவிறுப்பான கட்டத்தை எட்டியுள்ளது. பிளே ஆப் சுற்றிற்கான ரேசில் தற்போது 7 அணிகள் இடம் பெற்றுள்ளன. இவற்றில் முதலிடத்தில் இருக்கும் கொல்கத்தா, இரண்டாம் இடத்தில் இருக்கும் ராஜஸ்தான் ஆகிய அணிகள் எளிதாக அடுத்த சுற்று முன்னேறிவிடும். ப்ளே ஆஃபில் மூன்று மற்றும் நான்காம் இடங்களுக்கு சென்னை, ஹைதராபாத், டெல்லி, லக்னோ மற்றும் பெங்களூர் அணிகளுக்கு இடையே போட்டி ஏற்பட்டுள்ளது.

இதனால் அடுத்து வரும் 10 நாட்கள் மிகுந்த விறுவிறுப்பான ஆட்டங்களை கொண்டதாக இருக்கும். இதற்கிடையே சென்னை அணியில் தோனி கடைசி சில ஓவர்களில் மட்டும் விளையாடுவது ஏன் என்ற விமர்சனம் எழுந்துள்ளது. ஏனென்றால் கடைசியாக அவர் சில பந்துகளை சந்தித்தாலும், அவற்றை சிக்சரும், பவுண்டரியுமாக விளாசி சென்னை அணிக்கு பலம் சேர்க்கிறார்.

அவர் முன்னரே களம் இறங்கினால் அது சென்னை அணிக்கு இன்னும் சாதகமாக அமையும் என்ற விமர்சனம் இருந்து வரும் நிலையில் இதற்கு சென்னை அணியின் பயிற்சியாளர் ஸ்டீபன் ஃப்ளெமிங் பதில் அளித்துள்ளார். இதுபற்றி அவர் கூறியதாவது-

தோனிக்கு தசையில் சிறிய காயம் ஏற்பட்டுள்ளது. இதனால் அவருக்கு பாதிப்பு ஏற்படாது என்பதை முன்னரே தெளிவுபடுத்தி விட்டோம். நாங்கள் அவருடைய பணிச்சுமையை குறைக்க பார்க்கிறோம். அவர் நீண்ட நேரம் பேட்டிங் செய்வது ரிஸ்க்கை ஏற்படுத்தலாம். நாங்கள் அவரை இழக்க விரும்பவில்லை. அவருடைய அனுபவம் அணிக்கு தேவை என்பதால் அவரை பாதுகாக்க விரும்புகிறோம். எனவே தான் கடைசி சில ஓவர்களில் தோனி பேட்டிங் செய்ய நாங்கள் திட்டமிட்டுள்ளோம். என்று கூறியுள்ளார்.

.