மூக்கா:
கடந்த வியாழக்கிழமை புருட் தீவுக்கு (Pulau Bruit) அப்பாலுள்ள தஞ்சோங் சிரிக் கடல் பகுதியில் ஏற்பட்ட பலத்த அலைகளால் படகிலிருந்து கடலில் தூக்கி வீசப்பட்டு மாயமானதாகக் கூறப்பட்ட மீனவர் ஒருவர், நேற்று (சனிக்கிழமை) பிற்பகல் சடலமாக மீட்கப்பட்டார்.
மலேசிய கடல்சார் அமலாக்க ஏஜென்சியின் (MMEA) தஞ்சோங் மனிஸ் மண்டல இயக்குநர், தளபதி மஹ்கோஸ் ஜுயிங், இந்தத் தகவலை உறுதிப்படுத்தினார்.
பாதிக்கப்பட்ட 59 வயதான ஆல்டின் ராக்லி என்பவரின் சடலம், மீனவர்களின் உதவியுடன் தேடுதல் மற்றும் மீட்புக் குழுவினரால் நண்பகல் 12.05 மணியளவில், பண்டாய் டெகாஜோங்கிற்கு வடமேற்கே சுமார் 3.5 கடல் மைல் தொலைவில் மீட்கப்பட்டது.
“தேடுதல் பணி பிற்பகல் 1.20 மணியளவில் முடிவடைந்தது. சடலம் குடும்ப உறுப்பினர்கள் அடையாளம் காண்பதற்காக கம்போங் டெகாஜோங் துறைமுகத்திற்குக் கொண்டு வரப்பட்டு, மேலதிக நடவடிக்கைக்காகக் காவல்துறையிடம் ஒப்படைக்கப்பட்டது,” என்று அவர் இன்று வெளியிட்ட அறிக்கையில் தெரிவித்தார்.
முன்னதாக காலை 9 மணியளவில் விபத்துக்குள்ளான ஆல்டின் ராக்லி, தனது 42 வயதான மைத்துனர் கஹருதீன் புவாங்குடன், புருட் தீவில் உள்ள கம்போங் பெட்டானக்கிலிருந்து கோலா மாது நோக்கிப் பயணம் செய்து கொண்டிருந்தார். அப்போது படகு பலத்த அலைகளில் சிக்கி விபத்துக்குள்ளானது.
