கடனாக வாங்கிய 8000 ரூபாயில் முதலீடு.. இப்போ ரூ.600 கோடிக்கு சொத்து.. யார் இவர்?

பிசினஸ் உலகில் பெண் தொழில்முனைவோர்கள் முன்னெப்போதையும் விட அதிக உயரங்களை தொட்டு வருகிறார்கள். தங்களது மன உறுதி, அர்ப்பணிப்பு, புதுமையான யோசனைகள் மூலம் பல தடைகளை தாண்டி வெற்றிகரமான நிறுவனங்களை பல பெண்கள் உருவாக்கி வருகிறார்கள். இந்தப் பெண்கள் வெறும் தொழிலதிபர்களாக மட்டுமல்லாமல் பலருக்கும் உந்துசக்தியாகவும் இருக்கிறார்கள். வெறும் ரூ.8,000 முதலீட்டில் தொடங்கிய நிறுவனத்தை பல கோடி மதிப்பிலான நிறுவனமாக மாற்றிய மீனா பிந்த்ரா பற்றியே இன்று பார்க்கப் போகிறோம்.

மீனா பிந்த்ரா தொடங்கிய Biba Apparels என்ற பெண்களுக்கான ஆடை நிறுவனம், இந்திய பேஷன் பிராண்டில் முன்னனி நிறுவனங்களில் ஒன்றாக விளங்குகிறது. டெல்லி பல்கலைகழகத்தில் பட்டப்படிப்பை நிறைவு செய்த பிந்த்ரா, 20 வயதிலேயே திருமணம் செய்து கொண்டார். தன்னுடைய 40-வது வயதில் எந்தவித முன் அனுபவமோ முறையான பயிற்சியும் இன்றி வீட்டிலிருந்தபடியே எளிமையான பருத்தியிலான ஆடைகளை விற்பனை செய்யத் தொடங்கினார் மீனா பிந்த்ரா.

Biba Apparels நிறுவனத்தை பல சிரமங்களுக்கு இடையே தான் இவர் தொடங்கினார். நிறுவனத்தை நடத்துவதற்கு இவரிடம் போதுமான பணம் இல்லை. சொல்லப்போனால் இவரிடம் சொந்தமாக வங்கி கணக்கு கூட கிடையாது. ஆனால் இவரது கணவர் வங்கியிலிருந்து ரூ.8,000 கடன் வாங்கி கொடுத்தார். இந்த தொகையை முதலீடாக வைத்துதான் தனது நிறுவனத்தை தொடங்கினார் மீனா. இப்படிதான் 1988-ம் ஆண்டு BIBA பிறந்தது.

2004-ம் ஆண்டு தனது முதல் கடையை மும்பையில் உள்ள மாலில் BIBA திறந்தது. 2012-ம் ஆண்டு மார்ச் மாதத்தில் BIBA நிறுவனத்தின் ஆண்டு வருமானம் ரூ.300 கோடியை எட்டியது. தொடர்ந்து இவர்களுடைய பிராண்ட் மக்களிடம் வரவேற்பை பெற்று வந்ததால், 2020-ம் ஆண்டில் இவர்களின் ஆண்டு வருமானம் ரூ.600 கோடியாக அதிகரித்தது.

சொந்த தொழில் நடத்தும் தமிழ் சினிமா பிரபலங்கள்..
மேலும் செய்திகள்…