ஒலிம்பிக் வரலாற்றில் முதன்முறையாக… பாரிஸில் பிரமாண்ட ஏற்பாடு – News18 தமிழ்

உலகின் மிகப்பெரிய விளையாட்டு திருவிழாவான ஒலிம்பிக் தொடர் வரும் 26 ம் தேதி முதல் ஆகஸ்ட் 11 வரை பிரான்ஸ் தலைநகர் பாரிசில் கொண்டாடப்படவுள்ளது. 1924- ஆம் ஆண்டு பிரான்ஸ் நாட்டில் ஒலிம்பிக் போட்டிகள் நடைபெற்றன. 100 ஆண்டுகளுக்கு பிறகு மீண்டும் ஒலிம்பிக் திருவிழாவை நடத்த பிரான்ஸ் தயாராகவுள்ளது. லண்டனுக்கு பிறகு 3வது முறையாக ஒலிம்பிக் தொடரை நடத்தும் நாடு என்ற பெருமையையும் வசப்படுத்தியுள்ளது பாரிஸ்.

1924 பாரிஸ் ஒலிம்பிக் தொடரின் நிறைவு விழா நடந்த ஜூலை 26ம் தேதியே நடப்பாண்டு ஒலிம்பிக் தொடரின் தொடக்க விழா களைகட்டவுள்ளது. 100 ஆண்டுகளுக்கு பிறகு ஒலிம்பிக் தொடரை நடத்துவதால் உலகமே திரும்பி பார்க்கும் அளவிற்கு தொடக்க விழாவிற்கான ஏற்பாடுகள் நடைபெற்று வருகின்றன. இந்திய நேரப்படி ஜூலை 26 இரவு 11 மணிக்கு தொடக்க விழா நடைபெற உள்ளது.

ஒலிம்பிக் வரலாற்றிலேயே முதல் முறையாக தண்ணீரில் தொடக்க விழாவை நடத்த திட்டமிடப்பட்டுள்ளது. புகழ்பெற்ற ஈஃபிள் டவர் அருகில் உள்ள Seine நதியில் தொடக்கவிழா நடைபெறுகிறது. இந்த நதியை சுத்தப்படுத்த பிரான்ஸ் அரசு 12,522 கோடி ரூபாயை செலவிட்டுள்ளது.

Seine நதியில் நடைபெறும் தொடக்கவிழாவில் படகில் அந்தந்த நாடுகளை சேர்ந்த வீரர்கள் தங்கள் நாட்டு கொடியை ஏந்தி அணிவகுப்பு நடத்த உள்ளனர். இந்தியா சார்பாக தமிழ்நாடு டேபிள் டென்னிஸ் வீரர் சரத் கமல், பேட்மிண்டன் வீராங்கனை பி.வி.சிந்து ஆகியோர் தேசியகொடியை ஏந்தி இந்திய அணிக்கு தலைமை தாங்குகின்றனர். தமிழ்நாட்டை சேர்ந்த சரத் கமல் இந்திய கொடியை கையில் ஏந்தி செல்லும் பெருமித தருணத்தை காண மக்கள் ஆர்வமுடன் காத்திருக்கின்றனர்.

OTT-ல் பார்க்க வேண்டிய சிறந்த 10 தமிழ் காதல் திரைப்படங்கள்.!
மேலும் செய்திகள்…