Last Updated:
கே.எல்.ராகுல் குஜராத் அணிக்கு எதிராக 112 ரன்கள் அடித்து, விராட் கோலியின் சாதனையை முறியடித்து, 8 ஆயிரம் ரன்களை மிக விரைவாக கடந்த முதல் இந்திய வீரர் ஆனார்.
குஜராத் அணிக்கு எதிரான ஐபிஎல் போட்டியில் அதிரடியாக ஆடி சதம் அடித்த டெல்லி கேப்பிடல்ஸ் வீரர் கே.எல்.ராகுல், விராட் கோலியின் சாதனையை முறியடித்துள்ளார்.
டெல்லி அணியில் தேவைக்கு ஏற்ப ஓப்பனிங் மற்றும் மிடில் ஆர்டரில் இறங்கும் கே.எல்.ராகுல், குஜராத் டைட்டன்ஸ் அணிக்கு எதிரான லீக் ஆட்டத்தில் தொடக்க வீரர்களாக களம் இறங்கினார்.
வழக்கம் போல அதிரடியாக ஆடிய கே.எல்.ராகுல், குஜராத் அணியின் ககிசோ ரபாடா வீசிய 6 ஆவது ஓவரின் 5 ஆவது பந்தை சிக்ஸருக்கு அனுப்பினார். அப்போது, 36 ரன்களை கடந்த கே.எல்.ராகுல், டி20-யில் 8 ஆயிரம் ரன்களை கடந்து சாதனை படைத்தார்.
அதுமட்டுமின்றி, மிக விரைவாக 224 இன்னிங்சிஸ்களில் இந்த மைல் கல்லை எட்டும் முதல் இந்திய வீரர் என்ற சாதனையை படைத்துள்ளார் கே.எல்.ராகுல். இதற்கு முன்பு 243 இன்னிங்சிஸ் விராட் கோலி 8 ஆயிரம் ரன்களை கடந்ததே சாதனையாக இருந்தது. அவரது சாதனையை தற்போது கே.எல்.ராகுல் முறியடித்துள்ளார்.
தொடர்ந்து சிறப்பான ஆட்டத்தை வெளிப்படுத்திய கே.எல்.ராகுல், நேற்றைய போட்டியில் 65 பந்துகளில் 4 சிக்ஸர், 14 பவுண்டரிகளுடன் 112 ரன்கள் எடுத்து ஆட்டமிழக்காமல் இருந்தார். இந்த சதம் கே.எல்.ராகுலின் 5ஆவது ஐபிஎல் சதமாகும். இந்த சதத்தின் மூலம் ஐபிஎல் தொடர்களில் 5 அல்லது அதற்கு மேற்பட்ட சதமடித்த இரண்டாவது இந்திய வீரர் என்ற சாதனையை படைத்துள்ளார். விராட் கோலி மொத்தமாக 8 ஐபிஎல் சதங்கள் விளாசியுள்ளார்.
மேலும் இந்த சதத்தின் மூலம் 3 வெவ்வேறு அணிகளுக்கு சதமடித்த முதல் வீரர் என்ற பெயரை கே.எல்.ராகுல் பெற்றுள்ளார்.
May 19, 2025 11:03 AM IST
