துபாய்: மகளிர் ஒருநாள் கிரிக்கெட் உலகக் கோப்பை தொடர் முடிவடைந்துள்ள நிலையில் பேட்டிங் தரவரிசை பட்டியலை ஐசிசி வெளியிட்டுள்ளது. இதில் இந்தியாவின் ஸ்மிருதி மந்தனா, தென் ஆப்பிரிக்காவின் லாரா வோல்வார்ட்டிடம் முதலிடத்தை இழந்துள்ளார்.
அரை இறுதி மற்றும் இறுதிப் போட்டியில் சதம் விளாசியிருந்த லாரா வோல்வார்ட், உலகக் கோப்பை தொடரில் 571 ரன்களை வேட்டையாடி இருந்தார். இதன் மூலம் அவர், தரவரிசையில் 814 புள்ளிகளுடன் 2 இடங்கள் முன்னேறி முதலிடத்தை பிடித்துள்ளார்.
ஆஸ்திரேலிய அணிக்கு எதிரான அரை இறுதி ஆட்டத்தில் சதம் விளாசிய இந்திய அணியின் ஜெமிமா ரோட்ரிக்ஸ் 9 இடங்கள் முன்னேறி முதன்முறையாக 10-வது இடத்தை பிடித்துள்ளார்.
ஆஸ்திரேலியாவின் ஃபோப் லிட்ச்ஃபீல்ட் 637 புள்ளிகளுடன் 13 இடங்கள் முன்னேறி 13-வது இடத்தை அடைந்துள்ளார். அதே அணியை சேர்ந்த எலிஸ் பெர்ரி 669 புள்ளிகளுடன் 7-வது இடத்தை நியூஸிலாந்தின் சோபி டிவைனுடன் பகிர்ந்து கொண்டுள்ளார். இந்திய அணியின் கேப்டன் ஹர்மன்பிரீத் கவுர் 4 இடங்கள் முன்னேறி 634 புள்ளிகளுடன் 14-வது இடத்தை பிடித்துள்ளார்.
பந்துவீச்சு தரவரிசையில் தென் ஆப்பிரிக்காவின் மரிசான் காப் 712 புள்ளிகளுடன் 2 இடங்கள் முன்னேறி 2-வது இடத்தை பிடித்துள்ளார். அரை இறுதி ஆட்டத்தில் அவர், இங்கிலாந்து அணிக்கு எதிராக 20 ரன்களை விட்டுக்கொடுத்து 5 விக்கெட்களை வீழ்த்தியிருந்தார். இங்கிலாந்தின் சோஃபி எக்லெஸ்டோன் 747 புள்ளிகளுடன் முதலிடத்தில் தொடர்கிறார். இந்தியாவின் தீப்தி சர்மா 657 புள்ளிகளுடன் 5-வது இடத்தில் உள்ளார்.
