கேரளாவைச் சேர்ந்த தாமஸ் குரியன், அனைவருக்கும் ஒரு சிறந்த எடுத்துக்காட்டாகத் திகழ்கிறார். அவர் ஐஐடி மெட்ராஸில் படிக்கும்போது, படிப்பை பாதியில் நிறுத்தினாலும், இன்று உலகளவில் மிகப்பெரிய தொழில்நுட்ப நிறுவனங்களில் ஒன்றான கூகுள் கிளவுட்டின் தலைமை நிர்வாக அதிகாரியாக உயர்ந்துள்ளார். பிரமிக்க வைக்கும் அவரது இந்த உச்சம், அனைவருக்கும் உந்துதலைத் தருகிறது என்றுதான் சொல்ல வேண்டும்.
தாமஸ் குரியன், தனது பள்ளிப் படிப்பை பெங்களூருவில் உள்ள செயிண்ட் ஜோசப் பாய்ஸ் உயர்நிலைப் பள்ளியில் முடித்தார். பிறகு, ஐஐடி மெட்ராஸில் தேர்வு பெற்றிருந்தாலும், அவர் அமெரிக்காவின் புகழ்பெற்ற பிரின்ஸ்டன் பல்கலைக்கழகத்தில் மின் பொறியியலில் இளங்கலைப் பட்டம் பெற முடிவு செய்தார். அதற்குப் பின்னர், ஸ்டான்ஃபோர்ட் கிராஜுவேட் ஸ்கூல் ஆஃப் பிசினஸில் எம்பிஏ முடித்து, உலகளாவிய நிர்வாகத் துறையில் ஒரு வலுவான அடிப்படையை அமைத்தார்.
தொடக்கத்தில் அவர் மெக்கின்சி & கம்பெனியில் ஆலோசகராகப் பணியாற்றினார். பின்னர், தொழில்நுட்ப யுகத்தில் முக்கிய போட்டியாளரான ஆரக்கிள் நிறுவனத்தில் சேர்ந்து அங்கு 22 ஆண்டுகள் பணியாற்றினார். அந்த காலகட்டத்தில், அவர் 32 நாடுகளில் 35,000 பணியாளர்களைக் கொண்ட ஒரு பெரிய குழுவை நிர்வகித்து வந்தார் என்பது குறிப்பிடத்தக்கது. எனினும், 2018ஆம் ஆண்டு, ஆரக்கிளின் இணை நிறுவனரான லாரி எலிசனுடன் ஏற்பட்ட கருத்து வேறுபாடுகளுக்குப் பிறகு அவர் பதவியிலிருந்து விலகினார்.
அதன் பின்னர், கூகுள் அவரை கூகுள் கிளவுட்டின் தலைமை நிர்வாக அதிகாரியாக நியமித்தது. இவர் 2018-இல் கூகுளின் சிஇஓ-வாகப் பொறுப்பேற்றபோது, கூகுளின் கிளவுட் சேவை, அமேசான் மற்றும் மைக்ரோசாப்ட் அசூர்-இன் கிளவுட் சேவைகளுக்குப் பின்னால் இருந்தது. ஆனால், தாமஸ் குரியனின் தலைமையின் கீழ், கூகுள் கிளவுட் தற்போது ஆல்ஃபாபெட் நிறுவனத்தின் மிகவும் முக்கியமான வளர்ச்சிப் பிரிவாக மாறியுள்ளது. 2025-ஆம் ஆண்டின் முதல் காலாண்டில் மட்டும் கூகுள் கிளவுட் ரூ.1.02 லட்சம் கோடி வருவாயைப் பெற்று, அதன் ஆண்டு வளர்ச்சியில் 28% உயர்வைப் பதிவு செய்துள்ளது. மேலும், ரூ.18,350 கோடி வருமானம் மூலம் ஆல்ஃபாபெட் நிறுவனத்தின் லாபத்திற்கும் முக்கிய பங்களிப்பைத் தந்துள்ளது.
அவரது வெளிப்படையான வழிகாட்டலும், வாடிக்கையாளர் தேவையை மையமாகக் கொண்ட செயல்திறன் உந்துதலும் கூகுள் கிளவுட்டை நவீன, வணிகத் துறைக்கு ஏற்றபடி மாற்ற உதவியுள்ளது. இன்று அவர் இந்திய பூர்வீகத்துடனும், உலகளாவிய சிந்தனையுடனும் செயல்படும் முன்னணி தொழில்நுட்பத் தலைவர்களில் ஒருவராக இருக்கிறார்.
2022இல், தாமஸ் குரியனின் நிகர சொத்து மதிப்பு சுமார் ரூ.15,000 கோடியாக இருந்ததாக மதிப்பிடப்பட்டது, இது அதே ஆண்டு சுந்தர் பிச்சையின் நிகர சொத்து மதிப்பான ரூ.10,215 கோடியை விட அதிகமாக இருந்தது. சிஎன்என்-ன் பட்டியலில் அவர் அமெரிக்காவின் அதிக சம்பளம் பெறும் 18வது மற்றும் ஐந்தாவது தொழில்நுட்ப நிர்வாகியாக இருந்தார்.
June 11, 2025 5:16 PM IST
