ஈரான் மற்றும் அமெரிக்கா இடையே நீண்ட இழுபறிக்கு பிறகு போர்நிறுத்த ஒப்பந்தம் கையெழுத்தாகி இருக்கிறது. இந்த ஒப்பந்தத்தின் மூலம் ஈரான் தனது நாட்டின் எல்லைக்கு உட்பட்ட ஹார்மூஸ் ஜலசந்தியை முழுமையாக போக்குவரத்திற்கு திறந்துவிட்டுள்ளது. அமெரிக்காவும் ஈரான் துறைமுகத்திற்கு செல்லும் தடைகளை அகற்றி இருக்கிறது. இதனால் கப்பல் போக்குவரத்து படிப்படியாக சீரடைந்து வருகிறது. இந்த ஒப்பந்தம் குறித்து இஸ்ரேல் தனது அதிருப்தியை வெளிப்படுத்தி இருக்கிறது. ஆனாலும் அதனை அமெரிக்கா கண்டுகொள்ளவில்லை.
இந்நிலையில் அமெரிக்க அதிபர் டொனால்டு ட்ரம்ப் அளித்த பேட்டியில், ”போர் ஒரு உலகளாவிய பொருளாதார மந்தநிலையாக மாறுவதைத் தடுப்பதற்காகவே இந்த ஒப்பந்தத்தைப் பேச்சுவார்த்தை மூலம் மேற்கொண்டோம்.
இந்த ஒப்பந்தம் வாஷிங்டனுக்குக் கிடைத்த ஒரு தீர்க்கமான வெற்றியாகும்”என்று குறிப்பிட்டார்.
ஒப்பந்தத்தில் இரு தரப்பிலும் அளிக்கப்பட்ட சலுகைகள் குறித்த விவரங்கள் இன்னும் முழுமையாக வெளியிடப்படாத போதிலும், இந்த ஒப்பந்தத்தின் மூலம் ஈரான் நிபந்தனையற்ற முறையில் சரணடைந்து இருப்பதாக ட்ரம்ப் குறிப்பிட்டார். மேலும் போரை நடத்துவதில் தனக்கு எல்லையில்லா அதிகாரம் இருப்பதாகவும் அவர் குறிப்பிட்டார். ஈரானுக்கு எதிரான அனைத்து அமெரிக்க இராணுவ முற்றுகை முயற்சிகளும் நிறுத்தப்பட்டுள்ளன. ஒப்பந்தத்தின் அனைத்து அம்சங்களையும் பின்பற்றுவதை உறுதிசெய்ய அமெரிக்க கடற்படைப் படைகள் பொதுப் பகுதியில் இருக்கும் என்றும் அவர் கூறினார்.
ஈரானுக்கு 300 பில்லியன் டாலர் புனரமைப்புப் நிதியை அமெரிக்கா வழங்குவதாகக் கூறப்படும் செய்திகள் தவறானவை என்று கூறிய ட்ரம்ப், திட்டமிடப்பட்ட புனரமைப்பு மற்றும் மேம்பாட்டு நிதியானது அமெரிக்க வரி செலுத்துவோர் அல்லாமல், பெரும்பாலும் வளைகுடா நாடுகள் மற்றும் பிற சர்வதேச தனியார் முதலீட்டாளர்களால் வழங்கப்படும் என்று குறிப்பிட்டார்.
ஈரானும் இந்த பேச்சுவார்த்தை மூலம் தங்களுக்குத்தான் வெற்றி கிட்டியுள்ளதாக தெரிவித்துள்ளது. ஈரானின் உச்ச தலைவர் மொஜ்தபா கமேனி, புரிந்துணர்வு ஒப்பந்தம் குறித்து தனக்கு தனிப்பட்ட முறையில் கருத்து வேறுபாடுகள் இருப்பதாக பகிரங்கமாக ஒப்புக்கொண்டார், ஆனால் ஈரானின் உரிமைகள் பாதுகாக்கப்படும் என்று ஜனாதிபதி மசூத் பெசெஷ்கியன் மற்றும் மூத்த அதிகாரிகளிடமிருந்து உறுதிமொழியைப் பெற்ற பின்னர் அதற்கு ஒப்புதல் அளித்ததாக அவர் குறிப்பிட்டார்.
இந்த ஒப்பந்தத்தை அடைவதற்காக ட்ரம்ப் பல்வேறு நெருக்கடி உத்திகளைக் கையாண்டதாகக் கூறிய கமேனி, ஒப்பந்தம் ஒன்றைச் செய்துகொள்ள வேண்டிய கட்டாயத்தில் இருந்ததால் அமெரிக்க அதிபர் எல்லா வகையான செல்வாக்குச் சாதனங்களையும் பயன்படுத்தியதாகக் குற்றம் சாட்டினார். இதன் மூலம் டெஹ்ரானை விட வாஷிங்டனுக்கே அந்த ஒப்பந்தம் அதிகம் தேவைப்பட்டது என்று ஈரான் தெரிவித்துள்ளது. அதோடு உள்நாட்டில், ஈரான் நெருக்கடிகளுக்கு சரணடையவில்லை என்றும், சர்வதேச அளவில், பல மாதங்களாக இராணுவ மோதல்கள் மற்றும் பொருளாதாரத் தடைகள் இருந்தபோதிலும், தெஹ்ரான் ஒரு நிலைப்பாட்டில் இருந்து பேச்சுவார்த்தை நடத்தியதையும் ஈரான் தனக்கு கிடைத்த வெற்றியாக பார்க்கிறது.
பல ஈரானிய செய்தித்தாள்கள் இந்த ஒப்பந்தத்தை, அமெரிக்காவிற்கு ஏற்பட்ட ஒரு மகத்தான தோல்வி என்று வர்ணித்து கொண்டாடின. முதல் பக்கங்களில் வெற்றி முழக்கமிடும் தலைப்புச் செய்திகள் வெளிவந்தன, அதே நேரத்தில் ட்ரம்பை காட்டூன்களாக வெளியிட்டு இருந்தனர். இராணுவ மற்றும் இராஜதந்திர அழுத்தங்கள் வாஷிங்டன் விரும்பிய முடிவை தரத் தவறியதால், பேச்சுவார்த்தைக்குத் தள்ளப்பட்ட ஒரு தலைவராக அவரைச் சித்தரித்தன.
ஆனால் ஈரான் ஒப்பந்தத்தை மதித்து நடக்கவில்லையெனில் மீண்டும் தாக்குதல் நடத்துவோம் என்று அமெரிக்கா எச்சரித்துள்ளது.
இரு நாடுகளிடையே ஏற்பட்டுள்ள ஒப்பந்தத்தின் மூலம் மூன்றரை மாத கால மோதல்களுக்கு முற்றுப்புள்ளி வைத்துள்ளது. ஆனாலும் இன்னும் பல முக்கிய விவகாரங்கள் தீர்க்கப்படாமலே உள்ளன. அந்த விவகாரங்கள் பேச்சுவார்த்தைகளின் அடுத்த கட்டத்தில் கையாளப்படும் என்று எதிர்பார்க்கப்படுகிறது.
