உலகைச் சுற்றும் பயணத்தில் ஈடுபட்டிருந்த அமெரிக்க சொகுசுக் கப்பலொன்று, எரிபொருள் விலை அதிகரிப்பு மற்றும் நிதி நெருக்கடி காரணமாக கம்போடியாவின் சிஹானோக்வில் துறைமுகத்தில் நிறுத்தப்பட்டுள்ளதாக சர்வதேச ஊடகங்கள் தெரிவிக்கின்றன.
அமெரிக்காவின் ஃப்ளோரிடா மாகாணத்தைச் சேர்ந்த “வில்லா வி ரெசிடன்சஸ்” நிறுவனத்துக்குச் சொந்தமான எம்.வி. ஒடிஸி (MV Odyssey) என்ற கப்பலே இவ்வாறு நிறுத்தப்பட்டுள்ளது.
மேற்காசியாவில் நிலவும் பதற்றம் காரணமாக எரிபொருள் விலை அதிகரித்துள்ளதுடன், திடீரென ஏற்பட்ட நிதிச் சுமையும் கப்பலின் பயணத்தைத் தொடர முடியாத நிலைக்குக் காரணமாக அமைந்துள்ளதாக அதன் நிர்வாகம் தெரிவித்துள்ளது.
அடிப்படை வசதி
கப்பலின் ஒவ்வொரு அறைக்கும் ஒதுக்கப்படும் மாதாந்திர எரிபொருள் செலவு முன்னர் 1,800 அமெரிக்க டொலர்களாக இருந்த நிலையில், தற்போது அது 6,000 முதல் 8,000 டொலர்கள் வரை அதிகரித்துள்ளதாகக் கூறப்படுகிறது.
கடந்த 2024 ஒக்டோபரில் வட அயர்லாந்தின் பெல்ஃபாஸ்ட் துறைமுகத்திலிருந்து தனது உலகச் சுற்றுப்பயணத்தை ஆரம்பித்த இந்தக் கப்பலில், இம்முறை 203 பயணிகளும் 156 பணியாளர்களும் இருந்துள்ளனர்.
பயணம் இடைநிறுத்தப்பட்டதைத் தொடர்ந்து, பயணிகள் கப்பலிலிருந்து வெளியேற்றப்பட்டுள்ளனர்.
அவர்களுக்கான தங்குமிட வசதிகளை ஏற்படுத்த நடவடிக்கை எடுக்கப்பட்டுள்ளதாகக் கப்பல் நிர்வாகம் தெரிவித்துள்ளது.
எனினும், தமக்குத் தேவையான அடிப்படை வசதிகளும் இழப்பீடுகளும் வழங்கப்படவில்லை எனப் பயணிகள் குற்றஞ்சாட்டியுள்ளதாகச் சர்வதேச ஊடகங்கள் செய்தி வெளியிட்டுள்ளன.
| செய்திகளை உடனுக்குடன் தெரிந்து கொள்ள IBC தமிழ் WHATSAPP CHANNEL இல் இணைந்து கொள்ளுங்கள்…! |
