மேற்காசியாவில் அதிகரித்து வரும் புவிசார் அரசியல் பதற்றங்கள் காரணமாக அழுத்தம் ஏற்பட்டபோதிலும், எரிபொருள் மானியக் கொள்கைகளில் அரசாங்கம் திடீர் மாற்றங்களை அறிமுகப்படுத்தாது என்று துணைப் பிரதமர் படில்லா யூசோப் தெரிவித்துள்ளார்.
எந்தவொரு கொள்கை முடிவுகளும் அவசர நடவடிக்கைகளாக எடுக்கப்படாமல், விரிவான தரவு பகுப்பாய்வின் அடிப்படையில் எடுக்கப்படும் என்று அவர் உறுதியளித்தார்.
மேற்காசியாவில் நிலவும் மோதல்கள் ஒன்று முதல் இரண்டு ஆண்டுகள் வரை நீடிக்கக்கூடும் என்பதை அரசாங்கம் அங்கீகரிக்கிறது, ஆனால் எடுக்கப்படும் எந்தவொரு நடவடிக்கையும் பெரும்பான்மையான மலேசியர்களைப் பாதுகாப்பதற்கே முன்னுரிமை அளிக்கும் என்று ஃபடில்லா கூறினார்.
“இது நாங்கள் அறிந்த ஒரு சவாலாகும். எரிசக்தி விநியோகம் பாதுகாப்பாக இருப்பதை உறுதி செய்யவும், மக்கள் பாதுகாக்கப்படவும், பொருளாதார வளர்ச்சி தொடரவும், தொழில்துறைகளுக்குத் தேவையான ஆதரவு கிடைக்கவும் தேவையான நடவடிக்கைகளைத் தீர்மானிக்க நாம் தரவுகளைச் சார்ந்திருக்க வேண்டும்.”
புவிசார் அரசியல் நெருக்கடி மலேசியாவின் எரிசக்தி மாற்றத்தை எவ்வாறு தூண்டுகிறது என்பது குறித்து விஸ்மா பெர்னாமாவில் இன்று ‘பெர்னாமா ரேடியோ’வுக்கு அளித்த நேர்காணலின் போது படில்லா இதனைத் தெரிவித்தார்.
எரிசக்தி மாற்றம் மற்றும் நீர் உருமாற்ற அமைச்சருமான படில்லா, உலகளாவிய எரிசக்தி நெருக்கடியால் செலவுகள் கடுமையாக உயர்ந்த போதிலும், அரசாங்கம் எரிபொருள் மானியங்களைத் தொடர்ந்து வழங்கும் என்று கூறினார்.
மாதாந்திர மானியச் செலவு 6 பில்லியன் ரிங்கிட் முதல் 7 பில்லியன் ரிங்கிட் வரை அதிகரித்துள்ளது, இருப்பினும் பொருளாதார வளர்ச்சித் திட்டங்களுக்கு இடையூறு விளைவிக்காமல் மக்களுக்கான ஆதரவு தொடரும் என்று அவர் வலியுறுத்தினார்.
“வாழ்க்கைச் செலவு திடீரென உயர்ந்து மக்களைப் பாதிக்காத வகையில், தற்போதைய தரவுகளின் அடிப்படையில் சபா மற்றும் சரவாக்கில் ரான்95 (RON95) பெட்ரோல் மற்றும் டீசல் உள்ளிட்ட தற்போதைய மானியக் கொள்கைகள் பராமரிக்கப்படும்,” என்று அவர் கூறினார்.
தொடர்ச்சியான ஈடுபாடு
சமச்சீர் கொள்கை பதில்களை உருவாக்க தேசிய பொருளாதார நடவடிக்கை மன்றம் (Mten), தொழில்துறை பங்குதாரர்களுடனும் தொடர்ந்து ஈடுபடும் என்று படில்லா குறிப்பிட்டார்.
நெருக்கடி குறித்த கண்ணோட்டத்தில், உலகளாவிய எரிசக்தி விநியோகத்தில் சுமார் கால் பகுதியை கையாளும் ஹார்முஸ் நீரிணை (Strait of Hormuz) தொடர்பான விநியோகச் சங்கிலி பாதிப்புகளைத் தொடர்ந்து, ஒருவேளை இந்த இடையூறுகள் மூன்று ஆண்டுகள் வரை நீடித்தால், மிக மோசமான சூழ்நிலைகளை எதிர்கொள்ள அரசாங்கம் தயாராகி வருவதாக படில்லா கூறினார்.
உண்மையில், உள்நாட்டு நிலைத்தன்மையை உறுதி செய்வதற்காக ஆசியா-பசிபிக், ஆஸ்திரேலியா, தென் அமெரிக்கா மற்றும் ஆப்பிரிக்காவிலிருந்து மாற்று விநியோகங்களைப் பெற பெட்ரோனாஸ் (Petronas) செயலூக்கமான நடவடிக்கைகளை எடுத்துள்ளதாக அவர் கூறினார்.
அதே நேரத்தில், எல்லைகளில் மானிய விலை எரிபொருள் கசிவு மற்றும் கடத்தலைத் தடுக்க அரசாங்கம் அமலாக்கத்தை வலுப்படுத்தி வருவதாக படில்லா கூறினார்.
இதை அரசாங்கம் மட்டும் செய்ய முடியாது. பொதுமக்களின் ஒத்துழைப்பு மிக முக்கியம். முறைகேடுகள் நடந்தால் புகார் செய்யுங்கள், அப்போதுதான் விநியோகம் மற்றவர்களுக்கு அல்லாமல் நமது மக்களுக்கே சென்றடையும்.
“அதேபோல் எரிசக்தி மற்றும் நீரைச் சிக்கனமாகப் பயன்படுத்துவதும் முக்கியம். நாம் இணைந்து செயல்பட்டால், நீண்ட காலத்திற்கு விநியோக பாதுகாப்பை உறுதி செய்ய முடியும்,” என்று அவர் கூறினார்.
